CEBU, Philippines - Milampos ang Pañeros Dynasty ni Frank Manching sa pagpalayas sa defending champion Super Idols sa ilang
trono pinaagi sa pag-iskor og 73-61 nga kadaugan niadtong Biyernes aron langkaton ang korona sa 9th Integrated Bar of
the Philippines (IBP) 2012 basketball tournament didto sa Capitol Parish gym.
Human nagtabla, 16-all sa opening period, ang Pañeros kalit nga nagmangtas sa sunod nga kuwarter ubos sa
pagpangulo nilang Rowell Juban ug Nilo Balorio nga maoy mipasiugda sa ilang 22-8 scoring run aron moposte'g 14 puntos
nga labaw sa halftime sa iskor nga 38-24. Miinat pa ang labaw ngadto sa 19 puntos nga nakapaluya sa Super Idols ni
playing coach Bong Pepito.
Ang power forward nga si Barry Busi maoy nangu sa Pañeros nga mihipos og 21 puntos diin 12 niini gikan sa
fourth period. Si Nilo Balorio miamot og 15 puntos, samtang si Rowell Juban midugang og 11 puntos.
Ang Super Idols gipangulohan nilang Fermin Pepito ug Benjo Macion nga nagkumboya og 24 puntos.
Ang awarding ceremony didto gipahigayon sa Park Mall diin si Commissioner Atty. Kit Enriquez maoy nitunol
sa mga ganting salapi, tropeyo ug medalya ngadto sa mga mananaog.
Si Busi maoy napiling MVP ug maoy nangulo sa Mythical Five uban nilang Juban, Balorio, Pepito ug Mark
Russ Gamallo. Samtang si Manching maoy nakadawat sa "Sportsmanship" award.
PUNTOS MATAG USA
PAÑEROS (73) - Busi 21, Balorio 15, Juban 11, R. Pepito 6, Ruaya 5, Ordiniza 3, Molde 3,
Cabilte 3, Manching 2, Calipayan 2, Dinopol 2
IDOLS (61) - F. Pepito 14, Macion 10, Sumampong 7, Salubre 6, B. Pepito 5, R. Quijano 5, Piquero 4,
Arrabis 4, Santiago 4, Heyrosa 2 (BANAT NEWS)