BIR nakaipsot sa BOC sa ARENA-7 tilt

 CEBU, Philippines -  Naka-eskapo ang Bureau of Internal Revenue (BIR) nga gipangulohan ni Regional Director Atty. Hermeno A. Palamine ang powerhouse Bureau of Customs, 61-58 sa miaging gabii  sa nagpadayong 2012 Association of Regional Executives in National Agencies (ARENA) Region 7 basketball tournament didto sa Capitol Parish gym sa dalan Escario, ning dakbayan.
 Naglabaw ang BIR sud sa tulo ka kuwarter ug ang ilang skipper nga si Yoly Meso ug ang power forward nga si Leo Galvez maoy nagtimon sa opensa aron makahuygo.
 Nailog sa Customs ang labaw, 46-44 dihang milusad kini og 18-11  run sa tandem nilang Ronan Cañete ug Mark Henry Tan.
 Dali ra sab hinuon nabawi  sa BIR ang momentum dihang mipatuman kini sa ilang hugot nga depensa uban ang mainitong opensa aron maangkon ang ikaunom nilang daog.
 Si Allen Sorela maoy nangu sa BIR sa iyang 16 puntos, samtang sila si Meso ug Galvez nagkumboya og 21 puntos.
 Ang Customsmen gipangulohan ni Cañete, kinsa miposa og 15 puntos samtang si Tan ug Boodee Monteño midugang og 11 puntos matag usa.

PUNTOS MATAG USA

 BIR (61) - Sorela 16, Meso 11, Galvez 10, Limbaroc 7, Diamos 5, Bonsucan 4, Dizon 3, California 3, Del Rosario 2
 CUSTOMS (58) - Cañete 15, Tan 11,Monteño 11, Capalan 8, Mabalo 7, Manahan 3, Velez 2, Laraga 1  (BANAT SPORTS)