CEBU, Philippines - Nangandam na ang Rollway Customs Brokerage ug ang Mega L.A alang sa tinaktakay nilang duwa sa Lapu-Lapu Sports Club (LLSC) basketball tournament 2012 ugma didto sa Crown Regency sports gym sa Lapu-Lapu City.
Sugdan ang duwa sa alas-8 sa gabii.
Ang modaog maoy moharong sa nagpaabot nga Aries Lending alang sa "best-of-three" finals ubos sa bracket A.
Sa dili pa ang Rollway-Mega showdown, magsangka una ang LLSC Selection ug Mactan Islands Basketball Association (MIBA) Selection sa usa ka exhibition game sa alas-7 sa gabii.
Naglangkob sa LLSC Selection mao silang Alan Yu, Alan Sepe, Joel Ochea, Neil Belga, Rey Sandal, Tito Francisco, Celso Igot, Alex Dignos, Mar Hortel, Roger Ompad, Mario Bancale, Dondon Cinco, Leo Almacin ug ang Rollway Customs Brokerage coach nga si Chucky. Samtang ang MIBA Selection gilangkuban nilang King Celiz, Noli Paquibot, Joprex Velo, Swat Areglo, Nilo Bentain, Roy Genolos, Alexander Duran, Kiskisan Simplicio, Noel Cañete, Jorge Dayak, Olan Velasquez ug Arnel Patalinghug. (BANAT NEWS)