CEBU, Philippines - Nakabawos ang University of Sto. Tomas (UST) Growling Tigers ngadto sa karibal nilang UAAP Ateneo de Manila University (ADMU) Blue Eagles human moiskor og 82-76 nga kadaugan sa Game-1 sa Philippine Collegiate Champions League (PCCL) best-of-three finals kagahapon didto sa Fil Oil Flying V Arena sa San Juan, Metro Manila.
Krusyal nga otso puntos ang gihimo sa Growling Tigers sa nahabiling dos minutos, lakip ang go-ahead basket ni Melo Afuang, 74-73 sa katapusang 1:16. Nasundan sa jumpshot ni Karem Abdul ug sa lay-up ni Kevin Ferrer.
Si Ferrer maoy nangu sa UST sa iyang 18 puntos uban ang lima ka rebounds ug duha ka assists.
Ang Game-2 himuon ugma diin tinguha sa UST nga haruson ang finals aron modaog sa ilang unang korona sa kasaysayan sa PCCL.
Sa sayo pa, giusban sa San Beda Red Lions ang 12th CESAFI champion Southwestern University (SWU) Cobras sa iskor nga 64-56 aron sakmiton ang ikatulong pwesto.
Si Art dela Cruz maoy nangu sa Red Lions diin mihimo siya’g 12 puntos uban sa iyang siyam ka rebounds ug tulo ka assists.
Sa maong kadaugan, ang Red Lions nakadawat og P150,000 isip premyo sa ilang pagpahiluna sa ikatulong dapit, samtang Cobras midawat og P70,000. (BANAT SPORTS)