CEBU, Philippines - Gipanitan og maayo sa Bureau of Customs ubos ni District Collector Ronnie Silvestre ang Department of Interior and Local Government (DILG), 81-35 aron magsolo sa liderato sa Division B sa Association of Regional Executives in National Agencies (ARENA-7) 2012 basketball tournament niadtong Lunes didto sa DPWH covered court sa SRP, ning dakbayan.
Nagmangtas dayon ang Customs pagsugod sa duwa aron moposte og 21-7 sa giya nilang Ronan Cañete ug Boodee Monteño ug miburot pa kini ngadto sa 36 puntos nga nakapaluya'g maayo sa DILG.
Silang Cañete ug Monteño nagkumboya og 34 puntos aron pangulohan ang Customs nga mikulit sa ilang ikalimang daog sa unom ka duwa. Silang Bingo Matugas ug Jan Mose mihimo sab og double figures.
Sa sayo pa, ang Bureau of Internal Revenue (BIR) ubos ni Regional Director Atty. Hermeno A. Palamine midaog pinaagi sa default batok sa Department of Health (DOH).
Puntos matag USA
CUSTOMS (81) - Cañete 18, Monteño 16, Matugas 11, Mose 10, Rama 7, Velez 4, Capalan 4, Mabalo 3, Laraga 2, Remonde 2, Tan 2, Dela Cruz 2
DILG (35) - Echavia 11, Chavez 10, Medado 8, Genegobes 6 (BANAT SPORTS)