CCSC football tourney mosikad karon

CEBU, Philippines -   Mosikad na ang 1st Cebu City Sports  Center Football Friendship Games karong adlawa diha sa CCSC field.

Ulohan kini'g "Champion's League" gumikan kay ang magtigi mao man ang top performers sa Cebu City Olympics ug sa Cebu Provincial Meet duha na ka semana ang nakalabay.

Upat ka koponan matag  usa ang mopakita'g aksiyon sa elementary ug secondary division.

Magbangga sa elementary  division mao ang Cebu City nga  gilangkuban sa Don Bosco Technology Center, Mandaue nga girepresentahan sa Subangdaku Elementary School, Danao City Selection ug Ballesteros'  Team Warshockz.

Sa secondary, mao ang Don Bosco Technology Center uban sa Mandaue nga bitoonan sa mga magduduwa gikan sa Mandaue  Technical Institute ug Sacred Heart School-Ateneo de Cebu, Cebu Province nga  girepresentahan kasagaran sa Don Bosco Boys Home sa Liloan ug Abellana National School's Pomery-Futbolitos.

Matud pa ni  event organizer Ricky Ballesteros nga ang maong torneyo magsilbeng tune-up game sa mga koponan sa Sugbu alang sa Central Visayas Regional Athletic Association (CVIRAA) Meet didto sa  Dumaguete sunod bulan.  (BANAT SPORTS)