CEBU, Philippines - Tinguha karon sa UV Lancers-Gullas Team ni congressional candidate Samsam Gullas nga sakmiton ang korona dihang magbagat na sab ang ilang dan ni coach Yayoy Alcoseba apan niining tungora, dili Southwestern University (SWU) Cobras ang ilang ikasangka kung dili ang M.Lhuillier-Yayoy's Grill alang sa knockout finals sa Carcar Mayor's Cup karong alas 9 sa gabii didto sa Carcar Sports Complex.
Lima ka imports ang mopalig-on sa UV-Gullas nga maghimo kanilang paborito alang sa titulo karong tuiga ug sila mao ang 6-9 nga Cameroonian nga si JR Wade, 6-4 Mike Harry, point guard Ramsey Williams kanhi sa Air21, Glenn Bolocon, ang MVP sa Liga Pilipinas ug ang 6-7 nga si Mark Andaya nga kanhi gikan sa Barako Bull.
Ang UV Gullas ni coach Van Halem Parmis kinsa maoy labing maayong coach didto sa Mindanao ug sa Leyte, pagalangkuban sab sa mga local players nga silang ex-Lancers Harold Cincoflores, Jojo Maglasang, Randy dela Pisa, Ronaldo Bucao ug Ferdinand Lusdoc.
Mao sab kining grupoha ang miduwa sa Toledo Open basketball tournament.
Ning pagsuwat, wala pa hisayri kung kinsa ang mga players alang sa M. Lhuillier didto sa Carcar tungod kay dili mahimong paduwaon ni coach Alcoseba ang iyang mga batos sa Cobras tungod sa ilang pagpangandam sa umaabot nga Visayas Leg elimination round dinhi sa Sugbo sa Philippine Collegiate Champions League (PCCL) nga sugdan ugmang adlawa diha sa Cebu Coliseum.
Matod pa ni Carcar Sports Commission chairman Julie Flores, gituohan nga magpunsisok karong gabii ang mga basketball fans sulod sa gym aron mosaksi sa maong duwa nga maoy usa sa lamas sa ilang pagsaulog sa ilang kapistahan karong Nobiyembre 24.
Ang sponsor sa maong duwa mao ang Carcar municipal council ubos ni Mayor Nice Apura ug ang co-sponsor mao si board member Sergio Restauro sa Cebu 1st district. (BANAT NEWS)