PCCL elims sa Nob.13

CEBU, Philippines - Masaksihan na usab sa mga Cebuano fans ang kulbahinam nga collegiate basketball action diin mga top teams gikan sa Manila ang mopakita sa ilang abilidad atol sa Southern Islands Championship sa Philippine Collegiate Champions League (PCCL) karong Nobiyembre 13-15 diha sa Cebu Coliseum.

Sa opening matches sa tulo ka adlaw nga knockout tournament, ang University of the Visayas (UV) Green Lancers makigharung sa University of San Jose-Recoletos (USJ-R) Jaguars, human sa duwa sa  Visayas champion West Negros University Mustangs sa Bacolod City ug Mindanao titlist Holy Trinity College Wildcats sa General Santos City sa alas-2:30 sa hapon.

Ang San Sebastian College-Recoletos Golden Stags sa NCAA ug National University (NU) Bulldogs, nga misulod sa semifinals sa miaging UAAP magsangka sa alas-4 sa hapon sa Nobiyembre 14.

Ang mudaog sa sangka sa Southern Island semifinals maoy makigharung sa reigning CESAFI champion Southwestern University (SWU) Cobras.

Ilogan nila ang luna alang sa PCCL Final Four diin nagpaabot ang UAAP champion Ateneo Blue Eagles, NCAA crown-holder San Beda Red Lions ug kampiyon sa Metro Manila qualifying round nga SSC-R o NU.

Ang tickets nagkantidad og P230 sa courtside, P180 sa stage seats, P130 sa lower box ug P80 sa upper box. Sa dugang pangutana mahimong mutawag sa 255-1405.

Nietes batok Thai sa Dumaguete

Si WBO light flyweight champion Donnie "Ahas' Nietes sa ALA Gym gikatakdang makigsangka ni Danai Meendaeng sa Thailand sa usa ka ten round non-title bout karong Nobiyembre 17 didto sa Lamberto Macias Sports and Cultural Center sa Dumaguete City, Negros Oriental.

Ang maong away magsilbe nga tune-up match alang ni Nietes (30-1-3, 16 KO's) kinsa modepensa sa iyang bakus sunod tuig batok ni WBO minimumweight champion Moises Fuentes sa Mexico.

Si Nietes katapusang miaway niadtong Hunyo diin iyang gipilde pinaagi sa unanimous decision ang Mehikano nga si Felipe Salguer didto sa Resorts World sa Manila.

Moaway usab sa undercard mao si Jimrex "The Executioner" Jaca batok ni Jaypee Ignacio, Mark Vincent Bernaldez batok JR Mendoza, Crispin Parba batok Lyndon Castillo, Steve Ricaborda batok Marwin Cristota ug Ian Teves batok Jayvee Galea.

(LPM gikan sa Philboxing)

Thunder nakarekober

Maoy gipahungawan sa kapungot sa Oklahoma City Thunder ang ilang bisitang Toronto Raptors kinsa ilang gilampurnas kagahapon sa iskor, 108-88 sa nagpadayong NBA season kaniadtong Martes sa gabii nga gikalipay sa ilang coach nga si Scott Brooks tungod kay maayo kaayo ang gipakita sa iyang mga batos gikan sa sinugdanan.

Mibahug og 19 puntos si Russell Westbrook aron pangulohan ang Thunder kinsa naghupot na karon og 2-2 nga baraha. Midugang si Serge Ibaka ug 17 puntos alang sa Thunder kinsa naglabaw ug labing menos 29 puntos atubangan sa usa ka sellout crows nga gibana-banang mikabat ngadto sa 18,202 ka fans.

Gibuksan sa Thunder ang duwa pinaagi sa paghimo'g 30-17 run ug wala na kini magukod sa Raptors.

''I thought the start was a big part of our win tonight. We've talked about this the last few days. We're just starting to get in a defensive mindset,'' matod pa ni Brooks.

Duha ka adlaw human sila mapilde sa Atlanta dihang milabay sila'g 31 puntos sa ilang 20 ka turnovers, lahi ang duwa sa Thunder sa miaging gabii tungod kay sayo kaayo nilang gikontrolar ang duwa.

Matod pa ni Brooks ''We had good ball pressure and our bigs did a good job. Any time we can have four hands involved in a pick-and-roll we put ourselves in a position to have some success. I thought our activity and our deflections were good. We moved. We were all over the floor.''

Si Westbrook kinsa nagsul-ob og itom nga long-sleeve nga dunay padding aron protektahan ang iyang nagaras nga walang abaga, iyang napugngan ang leading scorer sa Raptors nga si Kyle Lowry ngadto lang sa dos puntos sa iyang 1 of 4 shooting sa wala pa kini mogawas may 1:29 ang oras sa second quarter tungod sa piang sa iyang tuong tikod ug wala na makabalik ug duwa.

Ang coach sa Raptors nga si Dwane Casey didto mopuntariya sa iyang opensa nga gisalig niya kang Jose Calderon, ang beteranong guard sulod na sa pito ka tuig.

''Jose is a veteran player and he'll be ready to go,'' matod pa ni Casey kinsang team makigsangka batok sa Dallas karong gabii. Matod pa ni Casey ''That's why I kept his minutes to a minimum tonight. He'll have to play big minutes and John (Lucas III) is a capable pointguard, so they'll have to be ready to go. Knowing Kyle, he's a tough guy and he'll get back as soon as he can.''

Silang Kevin Durant ug Kevin Martin parehong midugang og 15 puntos alang sa Thunder kinsa wala gyud mabiyai human sa duha ka free throws ni Durant may 7:44 ang nahibiling oras sa first quarter.

Ang Raptors kinsa adunay 1-3 nga baraha, gipangulohan ni Jonas Valanciunas kinsa mihakot og 18 puntos ug si Andrea Bargnani miamot og 16 puntos.

Sa laing duwa, naka-ipsot ang Chicago Bulls batok sa Orlando Magic, 99-93 ug gilubong sa Denver Nuggets ang Detroit Pistons, 109-92. (GGM gikan sa NBA.com)

Arce mibahad og knockout

Nag-awas ang kompiyansa ni Mexican boxing legend Jorge Arce (61-6-2, 46KOs) nga makahimo siya og dakung upset pinaagi sa pag-knockout ni Filipino boxing superstar Nonito Donaire (30-1, 19KOs).

Si Arce musuway pag-ilog sa WBO super bantamweight title ni Donaire sa Disyembre 15 didto sa Toyota Center sa Houston, Texas.

"Donaire hits hard but I plan to keep pressure on him and make him submit, and I am sure that I will knock him out," matud pa sa 33-anyos nga Mexican boxer sa boxingscene.com.

Si Arce miingon nga wala niya hatagi og atensyon ang pagtuo sa kadaghanan nga siya maoy underdog sa maong away tungod kay salig siya sa iyang abilidad nga iyang makuha ang bakus gikan ni Donaire.

Si Arce nag-train karon ubos sa giya ni Mexican Hall-of-Famer trainer Nacho Beristain kinsa mao usab ang trainer ni Juan Manuel Marquez kinsa makigharung ni Manny Pacquiao sa Disyembre 8 didto sa MGM Arena sa Las Vegas.  (BANAT NEWS)