Sa akong pag "Visita Iglesia" niadtong Huwebes Santo, daghan tag nasigpatan nga manindot nga talan-awon sa matag simbahan nga akong naadtoan. Usa sa nakakuha nako og atensiyon mao ang gipanday nga Galleon kilid sa altar sa San Fernando Rey Parish Church sa lungsod sa Liloan. Bisa'g wala pa hingpit mahuman, ma-aninaw na man gud nimong daan ang kanindot sa maong estraktura nga gidayan-dayanan pa og usa ka gamay'ng "parola" nga replika sa nabantog nang parola sa Liloan nga segun pa sa karaang sugilanon daghan nag nasalbar nga mga marinero sukad kini matukod kapin sa usa ka gatos na ka tuig ang milabay.
Usa sa mga nagpanday sa Galleon wala nako damha nga si Remus Samson diay, ang relihiyoso kaayong igsuon sa suod nakong higala nga si Homer. Mao tong nakahigayon mi pagpanguryoso dala na sab sa akong katingala kun nganong ilang gitukod ang maong Galleon. Unsa ang koneksiyon niini sa Semana Santa ilabi na sa kamatayon ni Hesus.
Sa tanto nakong pangutana, duna mi naka-estorya nga usa ka parokyano kansang mga gipang-esplikar kanako nakalamdag og maayo sa akong pangisip. Siya mao si Amy Fuentes, nga suod sab nga higala sa pamilyang Samson. Matud pa ni Mam Amy, nga gituyo kadto sa ilang Kura Paroko nga si Monsignor Sinfuldo Iriarte pagpatukod ang Galleon agi'g paghinumdum sa mahinungdanong behikulo nga gigamit sa mga Espanyol pagsabwag sa Kristiyanismo sa nasud.
Midugang si Mam Amy nga ang Galleon maoy nahimong sentro sa ilang tema agi'g pagpahinumdum ngadto sa mo-Visita Iglesia sa maong simbahan sa kamahinungdanon sa maong behikulo. Gani ilang gituyo og butang sa Galleon ang imahe ni Beato Pedro Calungsod agi'g timaan nga maong behikulo daku'g papel sa ilang pagsangyaw sa maayong Balita kauban si Padre Diego Luis de San Vitores didto sa isla sa Marianas hangtod nga nakalas ang ilang kinabuhi sa pagsangyaw nila sa ebanghelyo sa Ginoo niadtong tuig 1672 didto saTumon, Guam.
Sa kaugalingon pa niyang pulong, matud pa ni Mam Amy nga ang maong Galleon timaan ug pagpahinumdum sa atong mga kaigsuonan nga mao kini ang nahimo natong 'courrier of faith' labi na sa kanhiay'ng panahon diin sumusulbong pa lang ang pagtuo natong mga Sugbuanon sa kinabuhing Kristohanon nga giumol kanato sa mga banyagang Kastila.
Ug way duda nga ang tiunay nga pagsalig ni Beato Calungsod, nga pormal nang iproklamar o i-canonize nga usa sa Santo karong Oktubre 21 didto sa Vatican, usa ka dakung inspirasyon pagmugna sa maong replika sa Galleon. Bisan pa sa kalinghod sa iyang pangedaron, wala igsapayan ni Beato Pedro nga ihalad ang iyang kinabuhi gumikan sa way sama niyang paghigugma ug pagtuo sa Langitnong Amahan.
Sa akong pagbiya sa simbahan, akong gitutokan ang nakasulat nga tema haduol sa Galleon nga nagkanayon: "Faith is the gift of God to live and share with one another." Mao nga niadtong tungora akong gibawon sa akong dughan ug galamhan ang pagdayeg sa pamaagi ni Monsignor Sindulfo pagpaambit kun unsa ang hustong pamaagi sa pagsalig ug pagtuo ngadto sa Ginoo ginamit ang simbolo nga seguradong matatak sa huna-huna ug dili mahikalimtan sa iyang mga parokyano.
Seguradong ang maong Galleon maoy simbolo nga magtimaan kanato sa dalaygon nga binuhatan ni Beato Pedro nga angay panaminan ug pagasundan labi karon sa bag-ong henerasyon sa mga kabatan-onan.
* * *
Salamat diay sa tanang mga staff sa Green Lagoon Park didto sa lungsod sa Compostela sa maayo ninyong pag-abi-abi atol sa hamubo namong pagpuyo diha sa maanindot ninyong dapit. Ngadto nilang Boy Viscayno, Mary Rose Velasco, Remedios Figues, Maribeth Mojado, Anjelie Apitan ug Rachelle Garciso, daghan kaayong salamat ug hangtud sa sunod puhon.
Kun dunay mga komentaryo o reaksiyon mahimong mo-email sa mannix_80@yahoo.com o sa thefreemannewspaper@yahoo.com - BANAT NEWS