Una sa tanan, akong ipadangat ang mainiton nakong pagdayeg ni Atty. Danrex Joseph Tapdasan, ang reperi sa away tali nilang WBO Asia-Pacific bantamweight champion AJ 'Bazooka' Banal ug Mehikanong si Raul 'El Bule' Hidalgo niadtong Sabado sa gabii didto sa Waterfront-Cebu City Hotel.
Dunay pipila nga dili pabor sa iyang gibuhat, nga dili nato kalikayan sa kalibutan sa boksing diin huego-todo ug duguon nga kumbati ang sagad giapas sa mga manan-away. Apan para nako, dalaygon kaayo ang desisyon ni Tapdasan pag-undang sa away pipila na lang ka gutlo sa dili pa matapos ang unang hugna.
Nagsugod pa lang og panginit si Banal sa dihang mipatugpa kini'g makabungog nga left hook nga nakatay-og og maayo ni Hidalgo, nga niadtong tungora mikurog ang tibuok kalawasan nga daw siya nakuryentihan og pipila ka boltahe.
Sa dihang mipatunga si Tapdasan aron uwangon ang duha ka boksidor, si Hidalgo bisan wala sa saktong panimuot ug padayon nga nagkurog nagpunay og suntok. Lumoy kaayo ang iyang mga tuhod, dili makatan-aw og deritso ug wala siya makahibalo kun kinsa ang anaa sa iyang palibot niadtong tungora.
Saludo ko sa gipakitang kaabtik ug kalantip sa pangisip ni Tapdasan kay wala na siya maglangan pa bisan og usa ka segundo paghunong sa bugno aron malikay ang Mehikano ngadto sa peligrosong kahimtang. Kay simbako og gilugwayan pa niya ang away, manguros na lang kong daan kay seguradong brutal pa ang nahiaguman ni Hidalgo kun ugaling makahansak pa og dugang si Banal ngadto sa iyang ulo.
Mao nang gawas sa undanon niyang pagbatbat og boxing analysis ug sa tam-is kaayo niyang pahiyom sa higayon nga i-announce na iyang pangan ibabaw sa ring, misamot kataas ang akong pagtan-aw ug pagdayeg ni Tapdasan, nga usa ka garbo natong mga Bisaya!
* * *
Sa miaging semana, nakahigayon kita paghimamat og balik ni pound-for-pound king Manny Pacquiao atol sa iyang pagbisita dinhi sa Sugbu aron mag-taping og duha ka episode sa "Manny, Many Prizes," ang iyang game show nga mopatim-aw matag Sabado sa GMA-7 Kapuso network.
Gibati ko og tumang kahinam sa dihang nakakuyog ko ni Pacquiao nga nag-firing uban ni Miguel Osmeña, ang unico hijo ni Kongresista Tomas R. Osmeña, didto sa NS Outdoor Firing Range sa Tawason, dakbayan sa Mandaue.
Tungod lagi kay busy man kaayo si Pacman nga nag-target shooting gamit ang iyang 9mm nga pistola ug ingon man lain pang taas nga kalibre sa armas nga gipagamit kaniya ni Miguel, didto napunta ang akong atensiyon sa iyang kapikas nga si Jinkee, nga maoy iyang guwardiya sibil niadtong higayona.
* * *
Taliwala sa mga paka-paka ug masipang buto sa pistola, nagkatabi mi'g maayo ni Jinkee, nga sanag pag-full moon kon imong tan-awon gumikan sa kutis niyang porselana nga milutaw og maayo sa gisul-ot niyang silk green nga sinina.
Samtang nangaon mi og 'maruya' nga iyang gipapalit sa kilid nga tindahan, daghan ko og nakutlo nga pagtulon-an kabahin sa bag-ong dalan nga gibaktas karon sa giyukboan natong si Pacman. Matud pa ni Jinkee nga sukad nalamdagan ang huna-huna ni Pacquiao sa gahum sa Bibliya, daku na kaayo og kausaban ang kinabuhi sa iyang bililhon nga kapikas.
Gawas nga taas-taas na ang oras nga iyang gibubo ngadto kanila, si Jinkee misugilon kanako nga si Pacquaio dili na hilig maglakwatsa matag gabii. Mas pilion pa niini ang magpundo sa ilang balay samtang magbasa sa mga pulong sa Ginoo. Dili na moinom si Pacquiao bisan na lang gani og red wine. Dugang pa ni Jinkee nga daghan na og gibalibaran si Pacquiao nga mga milyones nga endorsement deals gumikan kay ang produkto nga gustong ipa-promote kaniya ilimnon mang makahubog.
Duna say mga suod nga higala ni Pacquiao ang miingon kanako nga lahi na gyud si Pacquiao ug halos kada-adlaw mopadala kini kaniya og mensahe pinaagi sa text kansang sulod mga mahinungdanong bersikulo gikan sa Bibliya.
Ang tawo duna gyu'y kausaban. Labing sulondon kun kining kausaban alang sa kamaayohan ug ingon man kapanaminan sa uban natong mga kaigsuonan. Wala na seguro pay makalabaw sa kausaban kun ang imong kaugalingon imong gisentro diha sa Diyos ug ingon man pagtamod sa mga sugo sa Labaw'ng Makagagahum.
Sa among panagkita, wala kaayo mi magka-estorya og dugay. Mao nang nanghinaut ko sa umaabot nga makadungog ko sa maayong balita gikan ni Pacman nga karon gawas nga gi-idolo nato isip usa ka boksingero, usa na sab karon ka ehemplo isip disipulo ni Hesukristo.
Kun dunay mga komentaryo o reaksiyon mahimong mo-email sa mailto:mannix_80@yahoo.com. o thefreemannewspaper@yahoo.com.