Mr Barangay

Brgy Ibabao, Cordova, Cebu

"Sir palihug kog pasusi diri sa among barangay kay naa man gihapo’y mga ginikanan nga nigamit sa ilang mga anak paatubang sa camera kay ibaligya sa mga foreigner. Madali unta ni’g tagad aron masumpo dayon ni.”

 Brgy Media Once, Toledo City

“Naa lang mi reklamo diri sa Sitio Tangke kay mura naman og napasagdan na ang sugal diri nga halos kada adlaw ug gabii naay magsugal. Hasta gud mga bata nakakat-on na sa sugal ug dili nalang ganahan moeskwela kay nabuang sa sugal.”

 Brgy Bankal, Lapu-Lapu City

“Ireklamo namo kining usa ka factory diri sa mga produkto sa mangga kay baho kaayo ang inalisngaw sa ilang aso. Nagpetisyon na mi bahin niini pero hangtod karon wala man gihapon tagda sa mga natungdan.”

 Brgy Basak, Cebu City

“Among lugar diri sa Tayud-Tagunol kay baho kaayo ang basura, dugay na mi nagpuyo diri pero wala gyud mi makabantay nga may mokuha sa basura diri mao nga adto nalang ilabay namo sa sapa.”

Brgy Hagnaya, San Remigio, Cebu

“Pastilan ning mga opisyal namo sa barangay diri halos wala may nahimo pagsumpo sa ilegal nga drugas. Ambot unsay rason nganong wala nila mapadakop ang mga tawo diri nga namaligya’g shabu nga unta nakaila man sila niining mga tawhana?”

 Brgy Tipolo, Mandaue City

“Naproblema gyud mi diri sa Jayme Compound bahin sa baha nga lawom na kaayo kun mag-uwan. Dugay na kaayo ni namo nga gireklamo pero hangtod karon wala man hatagi’g pagtagad sa pila na ka mayor nga nakalingkod.”

 Brgy Mabolo, Cebu City

“Diri sa Sindulan dapit kanunay gihapon nga may magpundok nga mga batan-on, hapit kada gabii. Among nahibaw-an nga manuyopay ni sila pero wala man gyud ni himoi og aksyon.”

 Brgy Fuente, Carmen, Cebu

“Ang karsada diri sa among barangay wala naman gyud balika sa contractor nga nakadaog sa bidding, labi na kining boundary sa among lungsod ug sa Catmon kay daghan na kaayong bangag-bangag ang karsada ug kuyaw kaayo sa mga motorista. Daghan na nga mga motorsiklo ang nadisgrasya diri.”

 Brgy Basak, Lapu-Lapu City

“Mohangyo unta mi nga butangan og tent o waiting shed ang terminal sa Tamiya kay luoy kaayo ang mga pasahero kun mag-uwan kay sigurado gyud mabasa. Ang labing luoy mao ang mga estudyante nga padung pa sa eskuwelahan kay dili na makasulod sa klase kay mabasa na man.”

 Brgy Tungasan, Lapu-Lapu City

“Husto gyud ang reklamo batok sa kapitan sa Brgy Caw-oy bahin sa iyang mga kabanay nga gikuhang J.O. sa siyudad pero walay nahimong trabaho. Hasta pud diri sa among barangay ug ubang lugar diri sa Olango, mao sad gihapon ang gihimo, ilang mga paryente gihimong mga J.O. pero wa magtrabaho.”

Brgy Tayud, Consolacion, Cebu

“Naay nagbuhat og ngohiong diri sa among lugar atbang gyud sa Pueblo del Grande nga ang ilang mga hinugas adto ra man ipaagay sa karsada, baho ra ba kaayo. Kabalo na ang taga barangay niini pero wala lang gyud sila’y gihimong aksyon.”

 Alang sa inyong mga reklamo text lang sa 09326425494