Mr Barangay

Brgy Marangog, Bogo City

“Ang akong reklamo diri sa among barangay mao ang wala pagpakabana sa among mga opisyal niining problema namo sa street lighting, ngitngit kaayo ang karsada panahon sa gabii. Mura’g wala makakita ang among mga opisyal sa angayang atimanon.”

 Brgy Mabolo, Cebu City

“Kining atbang gyud sa Mabolo National High School daghang bata magpatong diha sa taytayan unya maghingos og rugby ug vulca, unya mangilog man sa pagkaon sa mangagi dihang lugara. Maayo unta’g mabadlong nang mga bataa kay duol ra man unta na sa police station.”

Brgy Casuntingan, Mandaue City

“Naunsa na man tawon ning merkado diri sa among barangay nga gubaon naman kaayo, wala man gyud makahunahuna ang taga barangay pagpaayo niini. Buslot na ang mga atop, unya kun mag-uwan hitak kaayo ang sulod sa merkado ug dangog pa gyud.”

 Brgy Buaya, Lapu-Lapu City

“Kining karsada sa Sitio Saac padung didto sa Brgy Bankal gihimo na man hinuong parkingan sa mga trisikad matag adlaw nga tanan. Mao ni ang hinungdan nga matrapik kanunay ning karsadaha kay magpaugat ning mga trisikad driver.”

 Brgy Talavera, Toledo City

“Mga hapit usa ka tuig na nga ang gubaon namo nga taytayan diri wala gyud ayoha. Maglisod mi og labang hinungdan nga daghan kaayo nga mga bata ang mauwahi sa klase ug labi na sab namo nga nagtrabaho.”

 Brgy Yati, Liloan, Cebu

“Amo lang unta ireklamo ning usa ka imnanan diri dapit sa Sitio Pag-utlan kay saba kaayo panahon sa kagabhion ug usahay moabot pa hangtod sa kaadlawon. Maayo unta og maaksyonan kini sa mga opisyal namo sa barangay.”

 Brgy Dawis-Norte, Carmen, Cebu

"Magpatabang unta mi nga mapadak-an unta kining drainage system diri atbang sa gym kay kun mag-uwan dali kaayong moawas ang tubig. Ang nakaproblema pa gyud kay ang tubig ari padulong sa kabalayan.”

 Brgy Binongkalan, Catmon, Cebu

“Ari gyud mi magkaligoan sa may KM 47 sukad pa gyud sa una pero karon nahibulong na lang mi nga gamay naman lang kaayong balas ang baybayon. Among nahibaw-an nga gisigehan diay pagpanguha kay gisagol para sa himoong hollow block sa usa ka negosyante.”

 Brgy New Bago, Asturias, Cebu

“Naunsa na man ning gitrabaho diri nga Day Care Center sa among barangay nga wala man mahuman kay nahutdan kuno’g budget. Asa man diay ang kuwarta para sa maong proyekto nga P1.8 milion?”

 Brgy Binabag, Compostela, Cebu

“Grabe na ka lubaklubak ang karsada diri kay kun magsakay ka’g trisikad sigurado gyud nga mag-untol-untol tungod sa kabati sa agianan unya kun naa kay sakyanan kaugalingon, dali ra maguba kun kanunay moagi niining lugara.”

 Alang sa inyong mga reklamo text lang sa 09156203998