Cebuana Twins mipirma og kontrata sa Viva

CEBU, Philippines —  Gipaabot nga magbaha ang mga  proyekto sa Cebuana Twins nga sila si Shiela ug Shiena Patana pinaagi sa pag-abag sa  Viva Artist Agency (VAA).

Niadtong Biyernes , hingpit na nga nipirma og kontrata  ang kaluha sa VAA .

Lima ka tuig  nga management contract ang ilang gipirmahan sa maong talent agency .

Nitambong mismo sa contract signing ang big boss sa Viva nga si Vic del Rosario kinsa taod -taod na nga nakakita sa potential sa kaluha .

Anak ang kaluha sa head sa MTalents nga  si Aida Patana.

Suma pa ni  Aida nga  dugay na silang gitanyagan ni  Boss Vic  aron himuong talents ang kaluha apan wala dayon sila nidawat sanglit nagtrabaho pa kaniadto  sa usa ka call center sila si Shiena ug Shiela.

Sa taho nga gipaambit sa Showbiz ReMark, gikatahong  wholesome ang packaging sa kaluha ug isalang una sila sa nagkadaiyang shows sa ubang Viva talents aron mohumot kini sa publiko.

Nahimuot sab matud pa si Boss Vic sa  ilang panagkita sa niaging adlaw gumikan kay gipakita gyud sa kaluha  ang hugyaw nila nga talento sa pagsayaw.

Saulogon usab karong buwana ang  ika-15  ka tuig sa MTalents sa entertainment industry isip show producer ug artist supplier nationwide busa dili basta-basta ang gibating  kalipay ni Aida sanglit natunong gyud  kini sa paghatag og  katumanan sa damgo sa iyang mga anak alang sa hingpit nga pagsulod niini sa VAA.

Isip bag-ong talents sa Viva , malakip ang Cebuana Twins sa  anniversary concert sa  VIva artist nga  Magicvoyz  nga ipahigayon didto sa Viva Cafe PH karong Marso 30 ug  makauban usab nila si Robb Guinto.

Gipaabot  usab ang nakalinya nila nga acting workshops .

Gawas sa pag-arte , sudlan usab nila ang music scene sanglit dili pud basta-basta ang nagpahipi nila nga talento sa pagkanta .