Huliweek!

Mao kini ang programa sa kapolisan sa Dakbayan sa Sugbo niining pagtimaan sa Semana Santa kon Holy Week nga gisugdan kagahapon sa Domingo sa Bendita sa Lukay sa tanan nga Simbahang Katoliko hangtud na sa Pasko sa Pagkabanhaw sa atong Manunubos nga si Hesus.

Unsa man ni ang “Huliweek”? Ang huli tinagalog sa dakop diin magpadayon sa pagpanakop ang mga tinugyanam sa balaod sa mga tawo nga malapason sa balaod.

Bisan og gilauman nga magmingaw ang mga dagkong syudad sama sa Cebu City niining panahona kay mamauli man sa probinsya ang mga tawo apan wala kini magpasabot nga wala nay posibleng mahitabo.

Kini ang gihugtan sa pagpangandam sa Cebu Ciry Police Office.

Ang dakong kahilom ug kamingaw sulod sa adaw nga balaan giisip sa mga tinugyanan sa balaod nga dili kakumpyansahan, angayan sad kitang mobati og kakulba tungod kay ang mga dautang elemento dali ra kaayo makalusotlusot kon aduna man silay himoong dautan nga lakang batok sa katawhan.

Labi na kong magmotorsiklo sila wala gyuy makasabod nila kay mingaw kaayo ang karsada.

Tungod niini andam ug tagana ang kapolisan sa pagtubag sa mga alarma ug pagsikop sa mga badlongon kay basin nagtuo ang uban nga mobakasyon pud ang mga pulis, dili kay mao pud ni ang kahigayonan nga mopahigayon sila sa pagpatuman sa "Huliweek" program.

Sa katawhan nga mobakasyon seguradoha nga luwas ang inyong mga kabtangan gikan sa mga kawatan nga naghulat lang nga makatayming aron molampos ang ilang dautang tinguha, kong mahimo dunay mahabilin. Dili lang magsalig nga naay CCTV, o makatabang na sa pag-ila sa mga dautan apan dili na makapugong sa ilang pagabuhaton.

Dili nato isalig ang tanan sa kapolisan ang pagpanalipod sa atong kinabuhi, panginabuhi ug kabtangan, kita mismo maghatag og kasegurohan aning tanan aron wala kitay pagabasolan sa kauwahian.

Niining pagtimaan nato sa Semana Santa, atong hinunduman ang tumong niini nga mao ang paghandum sa sakripisyo sa atong Ginoo busa angayan lang ipatigbabaw nato ang kasolimne sa mga adlawng balaan kay sa ipatigbabaw ang kalipay nga pangkalibutanon nga hikalimtan Siya nga maoy atong gipahinungdan sa tanan.

Dili lang pagsikop sa malapason ang ipasabor sa “Huliweek” kon dili ang pagdakop sa atong kasingkasing nga unta mopitik sa tinuod nga essence sa atong pagtimaan sa semana nga mao ang atong paghinulsol sa mga kasal-anan nga atong nahimo ngadto sa atong isig ka tawo ug labaw sa tanan sa atong Ginoo.