Dugang bagahi

Naigo si kanhi mayor Mike Rama sa panultihon nga "when it rains, it pours".

Nagsunod-sunod gyud ang mga hagit nga iyang giatubang nga posibling dako og mamahimong epekto sa iyang tinguha nga makalingkod og balik isip mayor sa dakbayan.

Human sa kapin sa 10 ka buwan sukad siya gitaktak sa Ombudsman tungod sa nepotismo, karon laing kamanduan gikan gihapon sa Ombudsman ang nagtangtang niya sa katungdanan uban sa tibuok kinabuhi nga pagdili nga makahupot og katungdanan sa gobyerno.

Si Rama uban sa laing lima ka mga opisyal sa City Hall namatud-ang guilty sa kasong grave misconduct.

Kini nunot sa reklamo sa kanhi opisyal sa City Hall nga si Judel Bontuyan. Sigun sa pasangil ni Bontuyan, gipaburan ni Rama ang tulo ka mga kompaniya pagkolekta, paghakot ug paglabay sa mga basura nga way klarong public bidding.

Sa kadako sa kantidad sa kontrata nga kapin sa P49 milyones dili husto nga lamo-lamoon ang kontrata.

Nasuta sa Ombudsman nga duna gyuy kalapasan nga nahimo si Rama ug ang kauban niya nga mga respondents.

Apan alang ni Rama lain ning kaso sa pagpanggukod batok niya. Daling giklaro sa iyang mga abogado nga way epekto ang disisyon sa kandidatura sa kanhi mayor ug nga nagpabilin siyang usa sa mga kandidato alang sa umaabot nga eleksiyon.

Samtang tinuod nagpabilin pa siyang kandidato sa pagkakaron, apan di ikalimod ang dakong epekto niini ngadto sa moral sa iyang mga dumadapig.

Ang mga botante posibling magduha-duha na sa pagpili niya taliwa sa problemang iyang giatubang.

Posibleng maghatag lang og dugang problema ug krisis sa liderato sa syudad kun siya modaog og dili makalingkod tungod sa duha ka mga kaso nga pulos siya gitaktak sa katungdanan ug gidid-an nga makahupot pa og posisyon sa gobyerno hangtod sa hangtod.

Ambot ba og unsay giapas niining ubang mga politiko nga bisan dunay problema mamugos man gyud nga mopapili.

Dili man unta bangkaruti ang ilang grupo og materyal nga mamahimong kandidato pagkamayor nga way daghang bagahi nga gipas-an.