Pang-eleksyonn ang AKAP

Mipasaka ang partylist nga 1Sambayan ug Sanlakas og kaso nga certiorari ngadto sa Korte Suprema aron sa pagdeklarar ang 2025 national budget nga unconstitutional tungod sa gisukIp niini nga pundo alang sa AKAP nga matud pa nila, nahisama ra gayod sa “pork barrel”. Dakong bugal-bugal ang AKAP budget.  Gibuktot sa buhis ang mga Pinoy working class aron lang ihatag niadtong mga tapolan sa tuyo nga makuha ang ilang boto karong eleksyon.  Hinaut nga tangtangon ang AKAP sa Korte Suprema ug dili lang unta kini moingon nga “Sige na lang, karon ra bitaw ni’ng tuiga kay naay eleksyon.  Sa sunod tuig dili na ni palutson.”  Madahaan!

Mosamot ka tam-is

Milagda og tulo ka tuig nga kolaborasyon ang Sugar Regulatory Administration uga ang University of Tokyo aron mapa-usbaw ang produksyon sa asukal sa nasud sa Pilipinas ug sa Japan pinaagi sa research ug teknolohiya.  Maingon nato nga maanindot kini’ng maong kalambuan bisan tuod mubo ra ang 3 ka tuig nga panahon alang sa panagkumboya sa duha ka nasud.  Matud pa sa akong amigo, “Maayo unta kon molampus sila pagpa-usbaw sa produksyon sa asukal, kay segurado gyud nga motam-is pagsamot ang relasyon tali sa duha ka nasud.”  Muleeng!

Tumoy ra sa bolpen

Mipagawas og pahinumdum ang COMELE -Central Visayas ngadto sa mga empleyado sa Civil Service, labi na ang higpit nga pagdili sa mga empleyado sa pag-apil-apil sa bisan unsang partisan political activity..  Ginaingon man hinoon nga daghan ang pamaagi sa “pagpanit sa iring” busa aduna kita’y makita nga mga empleyado nga mopakita’g paglaban sa ilang kandidato sa pamaagi nga daw wala ra mahisupak sa balaod.  Makapahinumdum sa usa uyo-an nga misukmat sa iyang pag-umangkon kay nasayran niya nga didto kini mobotar sa iyang kaatbang.  Niini mitubag lang ang iyang pag-umangkon nga, “Tiyo, ayaw lang kabalaka kay kadtong imong kontra anaa ra siya sa tumoy sa akong bolpen, apan ikaw ania gyud sulod sa akong kasing-kasing.” Pagkatoytoy!

Walay uwaw ang naningil

Mipahigayon ang senado og pagdungog kabahin sa giingong abusado’ng taktika sa pagpangolekta sa utang sa mga online lending complanies luyo sa mga reklamo sa mga mangungutang kinsa nakasinati og pagpakaulaw sa social media ug pagpanghulga nga patyon.   Daghan tinuod ang mireklamo sa mga online lending institution kabahin ni’ng ilang dili makitawhanon nga pagpaningil.  Makapahinumdum sa among silingan nga nagyawyaw nga “walay uwaw ang nangutang kay dili mobayad bisan sigehan og paningil.”  Gitubag hinoon siya sa iyang gitinglan sa pag-ingon nga, “Ikaw maoy walay uwaw, kay bisan wala ko’y ikabayad, magsige gihapon ka’g paningil.”  Kadakong balighoo!

 “Botbot-lingin” lang

nagsugod na ang campaign period niadtong Marso 28 alang sa lokal nga eleksyon karong Mayo 12.  Nagsugod na usab ang mga kandidato sa ilang nagkalain-laing gimik aron madani ang katawhan sa pagbotar kanila. Luyo ni’ng tanan, subo palandungon nga gipaabot ra gihapon sa katawhan ang kwarta bugti sa ilang mga boto.  Busa, bisan unsa kamatinud-anon ang kandidato, alang sa mga botante mahimo’ng “botbot-lingin” lang ang iyang mga pasalig kon walay kwarta nga madawat.  Atala lagee!