Regulasyon ug kagawasan

Nagpadayon pa ang mga sakop sa Ubos Balay Balauranan sa ilang gihimong investigation mahitungod sa mga peke nga impormasyon nga mikatap sa social media. Dili moubos sa 20 ka mga vloggers ang giimbitahan sa mga magbabalaud.

Usa lang ang tumong sa congressional investigation: in aid of legislation.

Apan unsa pa man nga balaud ang gikinahanglan nga ipalabang sa mga magbabalaud nga anaa naman daghang balaud nga nag-regulate sa kagawasan sa sulti ug pagpadayag. Ang electronic libel gihimong balaud alang sa pag-regulate sa social media gawas libel ug slander ubos sa Revised Penal Code.

Hinuon kun gusto man g’yud sa magbabalaud nga magpalabang og balaudnon nga mag-regulate sa false information, mas maayo nga maoy ilang tutokan ug klarohon unsa man gayod ang buot ipasabot sa false information o fake news aron malikayan ang pag abuso sa balaud.

Dili ta buot nga ang balaud nga ipalabang sa mga magbabalaud mahimong kasangkapan sa paghikaw sa kagawasan sa matag usa kanato sa pagpadayag. Dili ta buot nga ang Pilipinas mahisama sa mga nasud nga China ug Russia diin ang ilang mga balaud nahimong kasangkapan sa ilang gobiyerno sa paghikaw sa ilang katawhan sa pagpadayag.

Karon pa lang daan kinahanglan nga mag-igmat ug magmabinantayon ang atong mga mata kay sa tuno sa mga pamahayag gikan sa Malakanyang daw sa gikondisyon na ang katawhan sa dili pagsulti og dili maayo sa administrasyong Marcos tungod sa gibuhian niining mga pagpanghulga.

Sa klase sa mga magbabalaud karon, dili layo ang posibilidad nga magpalabang sila og mga balaud nga mohaum lamang sa ilang interest ug sa interest sa Malakanyang. Samtang tinuod nga dili siyento porsiyento ang kagawasan sa matag usa apan gikinahanglan nga ang regulasyon dili mahimong kasangkapan sa abuso ug mga abusado.