Fake news peddler

Gidakop sa kapolisan ang usa ka babayeng vlogger nga taga Cebu kay mipakatap kini og fake news nga nag-ingon, si Presidente Bongbong Marcos mopahimong legal kuno sa droga.

Ingon niini ang gi-post sa mao nga Cebuano vlogger. “Legal na daw ang droga. Grabe ka na man Marcos. Ngayon harapin mo ang lahat ng hamon kung makakabalik ka pa, pagkalooya sa mga enosent.”

Matud ni NBI-7 Regional Director Renan Oliva nga human nila makita ang maong post nga gi-upload sa social media, mohimo dayon sila og imbestigasyon.

Wa magtuo ang mga sakop sa NBI nga tinuod ang gi-post sa maong babayeng vlogger. Ang ubang bahin sa gi-post sa vlogger, ingon niini.

“Sa laban kontra droga at krimen, hindi natin kailangan dumaan sa madugong solusyon. Walang maniwala na ang solusyon sa krimen at droga ay pumatay ng libung-libong kapwa Pilipino. Hindi tama yun”

“Ang tamang paraan para tiyakin ang kapayapaan at kaayusan ay sa pamamagitan ng maayos na batas. Gumawa tayo ng batas na gawing Legal ang droga sa ating bansa.”

Pagkasayod nako nga nadakpan ang usa sa mga tigpakatap og mga fake news, nalipay ko kay kining maong mga tawo, makapagubot sa nasud kay magsabwag sila’g sayop nga mga balita.

Gitan-aw nako ang Profile Account sa maong vlogger, nakapanglingo-lingo ko. Nagsugod na unta siya nga nakadawat na og bayad gikan sa Meta sa iyang mga posts, apan dili pa kaayo dako.

Karon, ang vlogger nga si Wendy, taga Barangay Lagundi, Oslob, Cebu, nag-atubang na og kasong kriminal nga paglapas sa Article 154 sa Revised Penal Code in relation to Section 6 sa Republic Act 10175, ang Cybercrime Prevention Act.

Imbes makakwarta na siya, gihimo niya nga way bili ang iyang paninguha kay ang gamay niyang kinitaan sa pag-vlog, mahipunta ra man sa pagkuha niya’g abogado aron molaban kaniya sa iyang kaso nnga posibleng makapapriso niya og unom ka tuig ug multa nga P200,000.

Sayonan ka nga ang news item gikan sa usa ka TV station iya man nga giusab aron makita nga si Presidente Bongbong Marcos nagplano nga himoon na nga legal ang drogas.

Karon, hilak na lang ang mahimo sa maong vlogger samtang naa siya sulod sa prisohan sa NBI. Ang 39-anyos nga vlogger nangayo’g pasaylo kang Presidente Bongbong Marcos dihang gi-interview siya sa GMA-7.

Giangkon ni Wendy nga ang iyang gihimo aron lang nga daghang motan-aw sa iyang content ug makakwarta siya. Tarong ba gud na nga buhat? Ako, isip sakop sa legitimate media, wa gyud makagusto sa iyang gihimo.

Dasigon nako ang mga sakop sa NBI nga pangdakpa ang uban nga susama kang Wendy og binuhatan.