EDITORAL - Dili na ba luwas ang kadalanan?

Dili ikalimod nga duna nasay mga krimen diha sa kadalanan sama sa pagpanulis ug pagpamusil. Kini bisan paman sa mga gipanghimong kausaban sa mga estratehiya kontra kriminalidad sa atong kapolisan.

Mao nga dili sab mabasol ang mga netizens nga mokamparar sa sitwasyon kaniadto sa panahon ni kanhi presidente Rodrigo Duterte nga matud pa nila malinawon kaayo, dili sila magpanghadlok paggawas-gawas ug lakaw lakaw bisan lawom na ang kagabhion.

Ang pangutana, tinuod ba nga dili na luwas maglakaw-lakaw panahon sa kagabhion karon? Nganong daghan man lagi gihapong mga tawo bisan hangtud sa kaadlawon ug mangabuntagan?

Nganong dili man tanang police station ang dunay natalang krimen sa ilang mga hurisdiksyon kada gabii? Gani ang kapolisan miingon nga “isolated cases” lang kining mga pagpamusil kay ‘personal grudges’ ang motibo ug nangadakpan na sab ang pipila sa mga naghimo niini.

Sukad sa paglingkod sa bag-ong administrasyon giusab sab sa kapolisan ang ilang mga estratehiya. Usa niini ang gibuhat sa Cebu City Police Office anang ilang Oplan Bulabog.

Ang ilang operasyon gidesinyo aron pagpakgang daan sa mga posibleng krimen nga mahitabo palang pinaagi sa aktibong pagsikop sa mga notadong kriminal diha mismo sa ilang mga tagoanan ug paghimo og foot patrols.

Sa kampanya kontra ilegal nga drugas, kinilo-kilo nga mga shabu, mga marijuana ang nasakpan apil sab ang daghang mga drug suspects, wala lang hinuoy nahitabong insidente nga napugos sa pagpusil-patay sa mga polis ang suspek kay “nanglaban” nga maoy sagad nahitabo sa panahon sa administrasyong Duterte.

Tingali kuwang lang gyud ang mga tawo og impormasyon bahin sa mga kalamposan sa kapolisan kay nagpasulabi ang pagpakatap anang “politically motivated” nga mga posts sa social media nga gustong ipagawas nga peligro na kaayo ang nasud karon.