Tan-awa, naay miagi?

Padayon ang kontraktor sa Department of Transportation (DOTr) paghimo og sidewalks diha sa Osmeña Blvd. gikan sa Plaza Independencia paingon sa eskina P. del Rosario.

Duna nay mga dapit sa Osmeña Blvd. nga nakompleto na pagkahuman ang gihimo nilang sidewalks nga giiban gikan sa lapad unta nga karsada, ug hinungdan nga migamay ang kaagian sa mga sakyanan.

Kagahapon, gianinaw nako pag-ayo ang dapit diha duol sa Basilica Minore del Santo Niño, kay human na man ang gihimong aseras, kon duna bay mga tawo nga mangagi…. Sus, wa gyuy miagi bisa’g usa na lang.

Ang mga tawo didto gyud miagi sa “arcaded sidewalks” kanang aseras nga anaa ilawom sa mga building kay dili man sila mainitan. Unsa pa kaha kon mag-uwan? May moagi kaha diha sa sidewalk nga gihimo sa DOTr?

Usbon ko, nag-usik-usik lang gyud na sa kwarta sa kagamhanan kanang gigasto sa DOTr ug gipamugos sa pagpatuman. Una, ang Bus Rapid Transit (BRT) maoy gihimoan nila og exclusive lane, apan wa pa gani mahuman, naghimo na usab sila’g laing proyekto nga way kapuslanan.

Nakamugna lang hinoon kini og dugang problema sa trapiko dinhi sa Cebu City kay ang lapad unta nga Osmeña Blvd. nahimong gamay kay giibanan man ang karsada aron himoan og sidewalk.

Ambot, hain ibutang ang ilang pagka bright.

* * *

Nagsingabot na kuno ang summer, sa ato pa ang ting-init. Nagpasabot nga posibleng mokunhod o kaha mahubsan na usab ang atong suplay sa tubig nga magamit sa mga lumolupyo dinhi sa Metro Cebu.

Maayo sa probinsya kay duna may daghang tinubdan nga kakuihaan og tubig, apan dinhi sa siyudad kon makakuha ka man og tubig pinaagi sa paghimo’g tabay, ang tubig hugaw na kaayo.

Angay gyud nga ang Metro Cebu Water District (MCWD) mangita’g sulbad sa problema sa kanihit sa tubig. Aw, kami hinoon diri sa north district sa Cebu City, dili kaayo maproblema kay anaa man ang JE Hydro & Bio-Energy Corporation.

Mao kini ang kompaniya nga gikontrata sa MCWD sa pagsuplay og limpyong tubig nga gikuha gikan sa tin-aw ug limpyong tubig sa sapa didto sa Barangay Lusaran, bukid nga bahin sa Cebu City.

Tungod sa JE Hydro, namenos-menosan ang problema sa kadagkoan sa MCWD kay ang chairman sa JE Hydro nga si Engr. Joffrey Hapitan mipasalig nga paninguhaon nila nga makasuplay sila og dili momenos sa 150,000 ka baril nga tubig ngadto sa MCWD kada adlaw.

Atol sa dugay kaayong huwaw sa miaging tuig, kami diri sa bukid wa gyud tawon masakripisyo sa tubig. Salamat daan sa JE Hydro.