EDITORYAL — Nanikas ang tanan

Kada adlaw kung obserbahan og maayo ang mga tawo busy kaayo sa ilang mga ginbuhaton para manginabuhi, naandang mga buluhaton ug uban pa. Adunahan man o dili, tanan dunay mga tinagoang binuang ngadto sa gobiyerno.

Apan pipila lang gyud ang nihatag og atensyon aning pasimple ug dili kaayo halata nga pagpanikas sa mga tawo sa gobiyerno. Kanang dili kaayo halata nga sayop ug pagpanglimbong ang ilang gibuhat.

Usa niini kanang pagbutang og lamesa para sa ilang mga paninda diha sa aseras nga dili unta angay kay agianan kana sa mga tawo, apan tungod sa ilang pagmagahi (kay lagi nanginabuhi ra sila), mapugos ang mga tawo anha pag-agi sa mismong agianan sa mga sakyanan.

Lain pa niini, kaning mga drayber nga bantayan lang ang mga traffic enforcers , kung wala gani, pataka lang og loading ug unloading sa dili hustong lugar.

Sa mga kabalayan, ang mga basura dili pangbahigon sa malata ug dili malata. Ang uban grabe gyud, bisan dili oras tinglabay sa basura mosekreto gyud og labog sa ilang basura diha sa gawas.

Sa mga negosyante diha sa kamerkadohan, dunay daghang tikasan og timbangan. Mao sab sa mga dagkong negosyante, iyahay ra sab sila og panikas dili lang sa ilang mga trabahante kondili hasta pud ngadto sa gobiyerno.

Sa mga nagkadaiyang ahensiya sa gobiyerno, dunay daghang kurakot, palusot, subornohay ug uban pa.

Mao kini ang kamatuoran nga kada adlaw nanghitabo dinhi sa Pilipinas, butang nga naandan na sa tanan ug tungod kay gibalik-balik naman og buhat nga walay nipakgang, normal na kini nga bulohaton.

Kada adlaw nanikas ang mga Pilipino sa nasud, dili lang ang mga opisyales ug mga kawani sa gobiyerno, kondili ang tanan gyud.