Pila ra diay ka buok
Kon gisabaan na sa trolls, naalarma sa fake news nga ilang gipakatap kada adlaw, ug nabalaka nga nailad nang maoriya, palihug basaha ang survey sa Social Weather Stations (SWS): Mayoriya sa mga Pilipino (51%) pabor nga patubagon si kanhi Presidente Rodrigo Duterte sa extrajudicial killings (EJKs) sa drug war.
Pahinumdom kini sa kamatuoran nga nasapawan sa nagbaha nga pagbinastos ug pagpanghudlat sa social media: Dili tinuod nga mga tawo ang trolls, kada usa nila dunay gatosan ka pekeng accounts; ug dili tinuod ang ilang opinyon, kasagaran nila gibayran ug gidiktahan.
* * *
Sa dili pa magduda sa kabuot sa katawhan, nga humok sila og ilong ug mahimo rang bira-birahon sa mga grupo nga daotan og tuyo, subaya ang survey sa SWS nga gihimo niadtong Pebrero 15-19, usa ka buwan sa wala pa prisoha sa The Hague si Duterte: 25% ra ang supak nga paninglan siya sa EJKs.
Sa ato pa, bisan sa pagpaburot sa ilang siyagit sa people power, pinaagi sa pagpangawat og mga letrato ug video sa mas daghang tapok, usa ra sa kada upat ka Pilipino ang ilang natonto.
* * *
Laing makalipay nga numero sa survey sa SWS: Kinadaghanan dinhi sa Kabisay-an (62%) ang kumbinsido nga si Duterte ang responsable sa EJKs atol sa iyang pamunoan nga gibanabanang nikalas og hangtod sa 30,000 ka kinabuhi.
Wala makalimti ang kamatayon sa 4 anyos nga si Skyler Abatayo sa Bato, Ermita, Cebu City niadtong 2018 ug sa ubang inosenteng mga biktima sa Sugbo ug kasilinganang mga isla. Napukaw ang mga Bisaya sa kabangis sa inhustisya nga ilang nahiagoman.
* * *
Labing makapasubo nga numero sa SWS survey para sa kanhi presidente: 47% sa mga molupyo sa Mindanao ang kumbinsido nga ang kanhi presidente maoy utok sa EJKs ug busa angayng moatubang sa mga kasong gipasaka tungod sa bangis nga mga krimen. Giisip ni Duterte ang taga Mindanao nga lunod-patay niyang mga dumadapig. Nga bisan unsa pay mga pasangil, dili motalikod niya. Kay mapasalamaton sa iyang paghimo og kasaysayan isip labing unang Mindanawanon nga nakatungtong sa Malakanyang. Pero dili diay sila buta sa kapakyas sa iyang mga saad–apil nang pagbadlong sa drugas sulod lang sa tulo ka buwan. leolastimosa@gmail.com
- Latest
