Pinakadakong kidnapper

Gipasanginlan sa kampo ni kanhi Presidente Rodrigo Roa Duterte ang gobiyerno sa Pilipinas nga kidnapper tungod sa pagdakop sa kanhi presidente sa nasud sa iyang pagkanaug sa eroplano nga iyang gisakyan gikan sa gitambongan niini nga kalihokan sa mga Overseas Filipino Workers sa Hong Kong.

Basi sa Article 59 sa International Criminal Court procedure nga nakalatid sa Rome Statute mahitungod sa pagdakop giingon nga human sa pagdakop, ang akusado dadon kini sa nagdakop ngadto sa hukmanan nga adunay saktong gahom diin ang maong hukmanan motanaw sa pagkabalido sa warrant of arrest nga maoy gibasihan sa pagdakop ug ingon man sa pagkabalido sa pamaagi sa pagdakop. Human niini, ang hukmanan puwede nga mohatag og pagtugot sa akusado nga mahatag og kagawasan. Basi sa procedura, korte ug balaud gihapon sa Pilipinas ang sundon sa pagdakop.

Buot ipasabot nga sa pagdakop pahibawon ang gidakop sa rason ug kaso diin nakabasi ang pagdakop ug dili ihikaw kaniya ang iyang katungod sa pagkuha og abogado nga manalipod kaniya. Apan sukwahi ang gihimo sa gobiyerno tungod kay human gidakop ang kanhi presidente, wala siya pahibaw-a sa rason sa pagdakop kaniya, gani si kanhi Presidente Duterte pa ang nangotana sa polis sa rason sa pagdakop kaniya. Gihikawan usab siya sa abogado, gani hapit pa maposasi si kanhi Executive Secretary Medialdea nga nangabogar kaniya.

Ina kay dad-on sa hukmanan human sa pagdakop aron susihon ang pagkabalido sa arrest warrant ug sa pagdakop, ang kanhi Presidente didto dada sa Villamor Airbase dayon gipasakay sa usa ka pribadong eroplano ug gidala sa The Hague, Netherlands. Tungod niini, nahimong pinakadakong kidnapper si Presidente Bongbong Marcos Jr. nga maoy mitugot sa pagdakop ni kanhi Presidente Rodrigo Roa Duterte, kun atong toohan ang kampo sa kanhi Presidente.

Nganong gipadakop man ni Presidente Bongbong Marcos ang kanhi Presidente? Ang rason, gusto lang niyang ipakita nga dili siya moila og utang kabobot-on. Gusto lang niyang ipakita nga bisan si Presidente Duterte pa ang nagtugot nga makapauli sa nasud ang patayng lawas sa diktador ug nagpalubong niini sa Libingan ng mga Bayani ug dakog gikatabang sa paghimo niyang Presidente sa Pilipinas, dili siya molili niini kay WALA SIYAY UTANG KABOBOT-ON.