Oportunista ang politico

Gihatagan sa Comelec og exemption sa poll ban ang 12 ka cash aid program sa DSWD nga adunay kinatibuk-ang pundo nga mokabat og P32.27 bilyones. Tungod niini, makapadayon ang ahensiya sa pagpanghatag og ayuda sulod sa 45-day campaign period ni’ng nagsingabot nga midterm elections sa Mayo.  Mipahimangno ang Comelec nga dili mahimong gamiton ang ayuda sa politikanhong katuyoan apan segurado nga pahimuslan gihapon kini sa mga politiko.  Opotunista ang mga politiko busa dili nila palabyon kining maong kahigayonan kay ang ilang motto sa kinabuhi mao nga, “Kon asa ang libre’ng kaon, moadto pud ko.”  Gibangkong!

Gi-alimut-an si solgen

Matud pa ni PCO USec Claire Castro nga kinahanglan timbang-tiimbangon pag-ayo ni Solicitor General Menardo Guevarra kon haum ug angayan pa ba siya’ng magpabilin sa iyang pwesto isip Solicitor General human kini mibalibad sa pagpanalipod sa kagamhanan sa kaso batok kang kanhi Presidente Duterte sa International Criminal Court (ICC).  Mora’g nasulod sa pugon si Guevarra ni’ng kahimtanga.  Apan husto ang iyang giingon nga ang OSG dili lamang abogado sa kagamhanan kon dili manlalaban usab sa katawhan.  Haum sa kahimtang ni SolGen Guevarra ang panultihon nga, “Kon dili na ka maka-agwanta sa kainit, gawas diha sa kusina.”  Muleeng!

Solo ang negosyo

Mipasaka og kaso ang Department of Agriculture (DA) batok sa JRA and Pearl Enterprises Inc. tungod kay miangkat kini gikan sa China og P2.37 million nga kantidad sa sibuyas-bombay nga wala’y permit sama sa sanitary and phytosanitary import clearance.  Maanindot kini nga kalambuan labi na kon tinud-anay ang maong lakang sa DA.  Apan luyo ni’ng maong paglutos, adunay pagduda ang pipila nga pasundayag lang kining tanan.  Matud pa sa akong amigo, “Gigukod sa cartel ang kompetensya aron magpabilin nilang ma-solo ang ilang negosyo.”  Madahaan!

Cause of action

Miumol ang Kongreso og pundok sa mga batikan’g abogado nga motabang sa 11-member prosecution team sa impeachment trial ni Bise Presidente Sara Duterte sa senado.  Giingon nga boluntaryo’ng mitanyag sa ilang tabang ang mga abogado tungod sa ilang kayugot sa bise presidente.  Tinukmod kaha gayod sa kayugot ang pagboluntaryo sa mga private lawyers o adunay sila’y lain’g katuyoan ni’ng ilang pagtabang? Makapahinumdum sa usa ka abogado nga gisaway sa iyang kaatbang kay gipugos kuno niini pagpasaka ang kaso bisan tataw nga wala kini “cause of action”.  Niini, gitubag siya sa abogado nga, “Kana diay’ng 50 mil nga acceptance fee, dili diay na igo nga “cause of action?”  Pagkatoytoy! 

Sakpan ang maidlas

Gihukman sa Sandiganbayan Seventh Division si kanhi DPWH Assistant Director Florendo Arias ug lain’g lima ka kanhi opisyal sa DPWH nga mabilanggo sulod sa 300 ka tuig tungod sa multiple counts sa kasong graft ug estafa.  Ang kaso naggumikan sa mga minao-mao nga repair kunohay sa mga sakyanan sa ahensya gikan sa tuig 2000 hangtud 2001.  Sa kataas sa sentensya nga gipahamtang, bisan kon aduna pa’y siyam ka kinabuhi ang maong mga opisyal, dili gihapon kini paigo.  Mao kana’y giingon nga “nasakpan ra gyud ang mga maidlas.” Fezteleern!