EDITORYAL - Hinumdomi ang pamilya sa pagbotar

Siyam nalang ka adlaw magsugod na ang kampanya sa mga lokal nga mga kandidato gikan sa pagka-gobernador hangtud sa konsehal. Apan makita nang daan ang daghang mga posters aning mga kandidato bisan asa.

Karong eleksyon sa Mayo 12, duna na say gahum ang mga Pilipino sa pagpili og kinsay ilang sangunan sa tahas pagdumala kanila pinaagi sa ilang nag-inusarang boto.

Kani nga gahum maoy makatabang gyud sa katawhan nga makab-ot ang ilang mga gustong mahitabo sa pagdumala sa kagamhanan.

Dili unta kini usikan ang nag-inusarang boto aning pagpili og kandidatong wala gyuy klarong plano, direksyon, ug pangandoy para sa ilang mga konstituwente.

Dili unta mobotar og kandidato tungod lang kay sila anak, asawa, bana, pag-umangkon, apo o kadugo sa mga karaan ng politiko sa ilang mga lugar.

Dili unta magpadala lang sa bulatik sa estorya, dili porke maayong manulti ibabaw sa entablado,  maayo ang sa hitsura, kasikat, kamaldito, ang himuong basihan sa pagpili.

Ug labaw sa tanan, dili unta basihan ang gibag-on sa sulod sa sobre , dili magpadala sa pagpanghulga, pagpang-agni sa uban, ang desisyon sa kun kinsa ilang pilion.

Kun wala gani klaro ang plataporma, kun kini imposibleng mabuhat, wala motutok sa kaayohan sa lungsod ug sa katawhan ang ilang mga plano, senyales kana nga walay mapaabot nga kaayohan ang katawhan anang mga kandidatoha.

Kinahanglang pangitaon sa mga botante diha sa tagsa-tagsa ka plataporma sa mga kandidato kung naapil ba ang ilang mga pangandoy ug gusto nilang maoy mahitabo para sa ilang lugar, sa ilang kinabuhi ug kaugmaon sa ilang mga anak ug sa kabataan sa tibuok lungsod.

Kun naglibog pa gihapon, mas maayong lantawon ug hinumdoman sa botante ang kahimtang sa ilang pamilya, ilang mga anak, ang ilang kabutang, sitwasyon sa ilang lugar isip inspirasyon sa ilang pagboto.