Kinsay mas bakakon
Sulod lang sa pila ka adlaw, si kanhi Presidente Rodrigo Duterte walay kauwaw nga nag-usab-usab sa iyang istorya:
Sa diskurso sa Hong Kong niadtong Marso 9, niinsistir nga walay kasal-anan pero walay mahimo kon ipadakop sa International Criminal Court (ICC);
Dihang gipakita sa arrest warrant sa ICC pagkawas sa ayroplano sa Ninoy Aquino International Airport (NAIA) niadtong Marso 11, nideklarar nga, “You will just have to kill me. Hindi ako papayag kung kakampi ka riyan sa mga puti;” ug
Dayong tugpa sa Rotterdam The Hague Airport niadtong Marso 12, niangkon og responsibilidad sa drug war.
* * *
Dili nang kausab sa iyang istorya. Dili na siyang kapasulod sa media sa iyang prisohan. Iyang mga bisita nga silang kanhi Executive Secretary Salvador Medialdea ug Bise Presidente Sara Duterte igo lang nihulagway sa iyang kahimtang sa panglawas. Ug nga gimingaw siya og inun-onan ug nangayo og tsinelas ug medyas ug dugang mga tambal.
Ang video message sulod sa jet maoy kataposan niyang mensahe. Gipatuo ang iyang mga dumadapig nga ang pagkapriso maoy pagtuman sa iyang gisaad nga pagsakripisyo sa kampanya batok sa drugas.
* * *
Pero natuman bang pasalig sa mga polis nga siyay magpapriso kon kasohan sa pagtuman sa iyang sugo sa laktod nga pagpatay? Ang rekord sa Kampo Crame nagpakita nga walay tabang si Duterte sa mga polis nga napriso o nataktak o nasuspenso sa serbisyo.
Sa iyang pag-atubang sa House Quad Committee niadtong Nobyembre, nipasalig si Duterte paghatag og usa ka milyon ka pesos nga tabang sa mga polis. Hangtod sa iyang pagkapriso, wala katunol og bisan usa ka dako.
* * *
Bisan sa pagbaha og sayop nga kasayuran sa iyang troll army human sa pagdakop niya, lisod malupigan si Duterte sa kabakakon. Nakatsamba si Executive Secretary Lucas Bersamin sa paghulagway niya nga one-man fake news factory.
Mahimong malabwan lang sa amahan sa presidente nga nitugyan niya sa ICC. Si Ferdinand Marcos Sr. nasakpan sa US Army nga nangilad sa iyang Maharlika guerilla unit sa ikaduhang gubat sa kalibotan pero niinsistir og dugang mga medalya. Ilang paghulagway niya: “Marcos could tell the most brazen lie with the straightest of faces, then continue telling it until it became accepted as fact."
* * *
- Latest
