Kinsay sunod nga ipadakop sa International Criminal Court (ICC) sa mga pasangil sa Crimes Against Humanity ni kanhi Presidente Rodrigo Duterte?
Kon paminawon ang mga eksperto sa balaod, nga nagsubay sa mga husay sa ICC, duha ngadto sa tulo ka gipasanginlan nga tigpatuman sa drug war ni Duterte ang dugang nga maposasan (kay mas daghang sinumbong nagkahulogan og mas langay nga husay ug determinado ang ICC pagsukwahi sa mga pagsaway sa kalaygay sa ilang proseso); ug
Ubang mga dakpunon mahimong ginganlan na sa arrest warrant sa ICC batok ni Duterte.
* * *
May sukaranan ang kahadlok ni Senador Bato dela Rosa nga siyay sunod. Kay gibalikbalikan siya og hisgot sa koneksiyon ni Duterte sa laktod nga pinatyanay sa Davao Death Squad (dihang mayor ug bise mayor pa) ug sa tibuok Pilipinas (dihang presidente na).
Usa sa ebidensiya ni ICC Prosecutor Karim Khan mao ang gipirmahan ni dela Rosa nga Command Memorandum Circular (CMC) No. 16-2016 sa Project Double Barrel. Ug iyang diskurso human ilusad ang programa sa 2016 nga nag-awhag sa pagpatay sa drug lords ug pagsunog sa ilang mga balay.
* * *
Wala ipakita ang lista sa coperpetrators ni Duterte. Pero sa ubang bahin sa ICC warrant nalista ang mosunod:
Major General Vicente Danao (nipuli ni dela Rosa pagka hepe sa Davao City Police Office, DCPO, sa 2013-2016);
Bise Presidente Sara Duterte (mayor sa Davao City paglusad ni kanhi DCPO Chief dela Rosa sa Oplan Tokhang sa 2012); ug
Vitaliano Aguirre (justice secretary ni Duterte sa 2016-2018 nga nideklarar nga ang suspitsadong mga durugista walay human rights).
* * *
Atong atangan sa mosunod nga mga adlaw kon makumbinser ba ang mga huwes sa ICC Pre-Trial Chamber 1 duna bay igong mga ebidensiya ang prosecutor aron mopagawas sila og arrest warrants batok sa kaubanan ni Duterte.
Ang daotang balita para nilang dela Rosa ug kaubanan mao ang pahibawo sa Malakanyang nga ipatuman gihapon ang mosunod nga warrants sa ICC (nga dili na ta sakop) kon ipaagi gihapon sa International Criminal Police Organization (nga sakop pa ta). Wala hinuon moklaro ang palasyo kon private jet ba gihapoy pasakyan ug sama ba kapaspas ang pagpalupad nila ngadto sa The Hague.
* * *