Nganong sikat gihapon si Digong?

Dili ikalimod nga daghan pa ang misuporta ni kanhi Presidente Rodrigo Duterte, ilabi na karon nga gitanggong kini didto sa the Netherlands tungod sa giatubang niyang kaso sa International Criminal Court (ICC).

Gipasanginlan si Digong nga maoy utok sa daghang pagpamatay nga matud pa ang mga biktima, bisan og sila nalambigit sa drugas, wa kuno kini hatagi og due process.

Sa mga Prayer Rally nga pahinungod kang Digong, dili ikalimod nga naglawod-lawod ang gatusan ka mga tawo nga mipadayag og pagdapig sa kanhi presidente, ilabi na kon makakita sa makaluluoy niyang dagway karon.

Ang ako lang gyud nga hangyo nga samtang magpahigayon kamo og mga prayer rally, isi’g bantay mo nga way makasu’d nga mga tawo nga ang katuyoan mao ang paghimo og kagubot.

Ang mga batan-on karon wa masayod sa panghitabo kaniadto dihang ang rally sa mga oposisyon didto sa Plaza Miranda gibombahan sa mga tawo nga ang tumong mao ra gyud ang kagubot.

Tungod niadto, gigamit kini nga rason ni kanhi Presidente Ferdinand Edralin Marcos nga modeklarar og Martial Law, diin giputol ang demokrasya kay balaod militar na man ang gipatuman.

Ganahan ba kamo nga mobalik ang Martial Law, unya ang anak ni kanhi Presidente Marcos nga mao si Bongbong, mao na usab ang modeklarar? Ayaw gyud mo pagtugot nga mahitabo kini pag-usab.

Sa Martial Law, wa nay social media, wa nay radyo, wa nay TV, wa nay mga newspaper (gawas niadtong kontrolado nila nga dili mobalita og mga makadaot sa kagamhanan). Gusto ba kamo niana?

Balikon nako, duna sa’y mga maayong nahimo si Digong atol sa iyang administrasyon kay napatay man kadtong mga “untouchables” nga mga druglords, apan mao lagi, dunay mireklamo nga extra-judicial killings kuno.

Para nako, huwaton ko lang unsay kalamboan niining maong mga kaso nga giatubang ni Duterte sa ICC. Ingon niana man gyud kon pasanginlan ka nga nakahimo og salaod, husayon man gyud sa korte.

Nakakita ko sa footage dihang si Digong miatubang sa Senate hearing ug giingnan niya si Senador Riza Hontiveros nga kon moabot ang mga modakop kaniya gikan sa ICC, “sampalin ko sila” unya kon dad-on siya didto sa Netherlands, pangsagpaon na usab kuno niya ang mga huwes.

Pero pag-abot niya didto, hapit man gani dili siya makalitok sa iyang ngalan dihang gipangutana siya sa iyang identity.

Usbon ko, kon ang katawhan magpasuwabi sa ilang mga pagbati nga wa ipasikad sa maayong paghunahuna sa isyu, hayan magubot ang Pilipinas ug mobalik kita sa kangiob ubos sa Martial Law.