Unsay sakto, unsay sayop
Taliwala sa nagbaha nga fake news human sa pagdakop ni kanhi Presidente Rodrigo Duterte ug pagkabalhog niya sa prisohan sa International Criminal Court (ICC), duha ang nibarug nga mga tinubdan sa saktong kasayuran:
Si kanhi Senador Antonio Trillanes IV maoy labing una nga nialerto sa administrasyon ni Presidente Ferdinand Marcos Jr. sa iyang nahibaw-an gikan sa mga tinubdan sa ICC nga nag-ung-ong nang arrest warrant batok ni Duterte; ug
Ang Rappler ni Maria Ressa maoy una ug bugtong publikasyon nga nipahibawo sa publiko niadtong Sabado nga naluwatan nang arrest warrant.
* * *
Wala motuo ang Malakanyang ni Trillanes. Giisip ang iyang kasayuran nga “huhungihong.” Maong hangtod sa pag-abot sa kopya sa 15 ka pahina nga arrest warrant niadtong Martes sa kadlawon walay klarong plano ang administrasyon unsaon pagdakop si Duterte.
May sukaranan ang Malakanyang sa pagduda ni Trillanes. Kay katulo siya napaso sa iyang pagsangyaw samang kasayuran sa niaging tuig: Sayop ang iyang pahibawo nga mogawas nang warrant niadtong Hunyo; wala matinuod ang pangangkon nga dunay warrant sa Hulyo; ug nabawo sang publiko sa paneguro nga may warrant na sa Agosto.
* * *
Lapad nga panghimakak ang nisugat sa report sa Rappler. Pulos nangangkon nga walay nahibaw-ang warrant ang mga ahensiya. Bisan ang ICC nidangop sa panagang sa pagdumili pagkomentaryo sa mga imbestigasyon.
Maong nitumaw ang kabalaka nga ang Rappler, nga nabantog sa kaligdong ug kamatinud-anon, mahimong napakyas pagsusi sa balita. Pero ang pagpakatap sa daghang polis sa mga tugpahanan sa Davao, Mactan ug Pasay nakapatumaw sa pagtuo nga nagpa-goryo-goryo ang gobyerno ug, sama sa naandan, sakto ang Rappler.
* * *
Gikan sa kampo sa mga Duterte ang kasagaran sa nikatap nga fake news (walay warrant, paghikaw sa tambal ug pagkaon ni Duterte, pekeng TRO ug pagdakop sa US). Walay nauwaw, ni nangayo og pasaylo dihang nasakpan. Nagpadayon hinuon sa pagpakatap og dugang mga bakak.
Sa mosunod nga mga adlaw hinaot nga mas kamao na tang mosubli unsay sakto ug sayop nga kasayuran. Makaila na ta sa mga opisyal nga kasaligan ug sa mga tinubdan sa mga kadudahan. Motultol sa media organizations nga napamatud-an nang tarung sa pagbalita. Ug molikay sa mga nagpataka lang o nagpagamit gyod sa pagpangilad.
* * *
- Latest
