Sayop nga maniobra
Sa pagsalikway sa pasangil sa crimes against humanity batok niya, nga giimbestigar sa International Criminal Court (ICC) human siya nipuli sa Malakanyang niadtong 2016, nakalimot si kanhi Presidente Rodrigo Duterte sa iyang gikumpisal nga mga krimen sa pag-atubang sa Senado ug sa House of Representatives.
Gihimo ni Duterte ang pag-angkon sa bangis nga mga krimen under oath sa iyang pag-atubang sa niaging tuig sa Senate Blue Ribbon Subcommittee ug sa House Quad Committee. Maong nagkauyon ang mga eksperto sa balaod nga mahimong gamiton ang iyang kaugalingong mga testimoniya batok niya.
* * *
Niangkon si Duterte og hingpit nga responsibilidad sa tanang panghitabo sa iyang drug war. Nilampos si Kongresista Jinkee Luistro sa pagpaangkon niya sa tanang legal ug ilegal nga mga panghitabo sa kampanya kay siya ang nagsugo.
Pero dihang gipangutana siya ni Senador Risa Hontiveros kon moangkon ba og responsibilidad sa laktod nga pagpatay sa mga polis sa Caloocan sa 17 anyos nga si Kian delos Santos ug ubang inosenteng mga biktima, nanghunaw si Duterte pinaagi sa pag-insistir nga personal ang responsibilidad sa mga polis nga nakahimo sa mga krimen.
* * *
Pero dili makaikyas si Duterte sa command responsibility ubos sa Republic Act No. 9851, o ang Philippine Act on Crimes Against International Humanitarian Law, Genocide, and Other Crimes Against Humanity, nga napasar niadtong 2009, kay:
Siyay nagsugo sa mga polis sa laktod nga pagpatay sa gidudahang mga durugista (nikumpisal sa pagtudlo nila pagtanom og mga ebidensiya ug pagdasig sa mga dinakpan pagsukol); ug maong
Wala siyay gihimo sa pag-imbestigar ug pagsilot sa mga polis nga nakalapas sa balaod.
* * *
Si Duterte mismo nahibawo sa nag-ung-ong nga pagpadakop sa ICC niya. Labing nakapa-apiki niya ang kaandam sa administrasyon ni Presidente Ferdinand Marcos Jr. sa paglawog niya sa tirong. Bisan nangugat gihapon si Marcos Jr. nga dili siya motabang sa ICC, pero ipatuman ang warrant kon ipaagi sa Internatinal Criminal Police Organization (Interpol).
Bisan nabungkag nang UniTeam, wala magpaabot si Duterte nga mao ni iyang dangatan. Masaligon nga ang iyang pagpakauwaw ni Marcos Jr. nga bangag ug paghulga og kudeta ug people power makahipos sa Malakanyang. Pero sayop ang iyang maniobra. Kay ang adlaw sa panudya niabot na.
* * *
- Latest
