Nanghipos sa dekorasyon

Gikataho nga ang kagamhanan sa Japan mopagawas na sa ilang stockpile nga bugas nga gitagana lang unta sa higayon sa kalamidad.  Una kining higayon nga ang hinungdan sa pag-gamit sa reserve nga bugas mao ang pagsaka sa presyo nga nahitabo usab tungod sa kakulang sa suplay.  Sa Japan, ang kakulang sa suplay tinukmod sa mga natural nga kalamidad samtang ang sa Pilipinas, tinukmod sa hoarding nga gihimo sa mga hangol nga negosyante.  Komento pa sa akong amigo, “Walay konsensiya ang mga negosyante dinhi kay kon maka-hoard sa suplay sa bugas daw nanghipos lang sa ilang mga dekorasyon ug mga series sa pasko.”  Fezteleern!  

Wala’y Pilipino’ng senador

Nangandak si Senador Ronald “Bato” dela Rosa nga andam siya makig-gubat sa West Philippine Sea (WPS) aron lang mapamatud-an nga dili siya pro-China.  Dili man kinahanglan nga pamatud-an ni Senador dela Rosa, ug ni bisan kinsang kandidato, nga dili sila pro-China.  Ang mahinungdanon nga ipamatuod sa mga kandidato nga silang tanan pulos mga pro-Filipino ug nga ang ilang gihunahuna ang kaayohan lang gayod sa katawhan’g Pilipino.  Haum ang panultihon nga, “Adunay PDP nga senador, adunay Liberal nga senador ug uban pa’ng senador sa laing Partido, apan wala gayo’y Pilipino nga senador.”  Muleeng!

Ang nag-ihap maoy magbuot

Mi-petisyon sa Korte Suprema ang advocacy group nga Right to Know, Right Now! Coalition (R2KRN) aron mapugos ang COMELEC sa pagpadayag sa kamatuoran kabahin sa pag-withdraw sa usa ka kauban sa joint venture nga nakadaug sa bidding sa P18 billion automation contract.  Dugay na nga gihandum sa katawhan ang usa ka limpyo, patas ug matinud-anon nga eleksyon, apan ni’ng kalambuan, daw pakyas na usab ang COMELEC sa pagpatuman niini.  Dinhi sa Pilipinas, tinuod ang panultihon nga, “Ang mga botante walay kagahum sa paghukom kay kadtong kadtong gitahasan pag-ihap sa balota mao man ang magbuot sa resulta.”  Atala lagee!

Multi-tasking ang Pinoy

Segun sa pagtuon nga gipahigayon sa Aon’s 2025, dul-an sa dos-tersiya (2/3) sa mga empleyado’ng Pinoy ang naglaraw nga mag-ilis og laing trabaho karong tuiga sa tinguha nga makakaplag og trabahoan nga adunay daghang benepisyo.  Ambot kon katuohan ba ang maong survey sa Aon’s.  Sa kakulang sa oportunidad dinhi sa Pilipinas, kuli hunahunaon nga mobiya na hinoon sa iyang kasamtangan’g trabaho ang empleyado.  Tungod sa kalisod karon, mag-multi tasking na man lang gani ang mga Pinoy. Pruweba niana mao ang akong silingan nga nanghambog nga, “Sa gabii, seafarer ko (mananagat diay) ug sa buntag, piloto usab ko (manananggot diay).”  Madahaan!

Tigulang na!

Gikataho nga ang kanhi bata’ng artista nga si Krystal Reyes naminyo na sa iyang non-showbiz partner nga si Lawrence.  Dili kini makahugyaw nga balita kay ang kaminyoon natural man nga dagan sa kinabuhi sa tawo kon moabot na siya sa hustong pangedaron.  Makapahinumdum sa akong amigo nga misuway unta pag-apply isip “child actor” sa usa ka TV network apan wala kuno siya madawat.  Sa dihang akong gipangutana sa hinungdan ngano nga wala siya madawat, yano ra sad siya mitubag nga, “Wala ko dawata isip “child actor” kay tigulang na man gud kuno ko.”  Pagkatoytoy!