Malanay ang utok

Nasayran sa bag-ong pagtuon sa mga siyentipiko nga adunay mga microplastics ug nanoplastics nga nakalusot ug anaa na sulod sa utok sa tawo. Nasayran usab nga kadtong nasakit og dementia, nasuta nga adunay daghan’g concentration sa microplastics sa ilang utok. Unang higayon kini nga nagbutyag nga dili lang diay mga ideya ug laraw (maayo man o dautan) ang masulod sa utok sa tawo kon dili mga pisikal usab nga mga butang sama sa plastik.  Basin baya moabot ang panahon nga ang tawo tambagan na sa doktor nga “Ayaw baya patandang og dugay sa adlaw kay basin malanay ang imong utok sa kainit.”  Madahaan!

Molusot ang artista’g komedyante

Segun sa survey nga gipahigayon sa Pulse Asia, gibanabana nga katunga sa mga rehistrado’ng botante naka-hukom na kon kinsa ang ilang botaran sa pagka-senador karong eleksyon sa Mayo 12.  Bag-o pa lang nagsugod ang campaign period ug daghan pa ang wala makaila sa mga kandidato.  Adunay dakong posibilidad nga dili matinuod ang survey labi na kon mopatigbabaw gihapon ang vote buying ug vote selling.  Matud pa sa akong amigo, “Dili kaayo ko magpadala ana’ng survey apan makigpusta ko nga mas daghan’g molusot nga mga kandidato nga artista ug komdeyante.”  Fezteleern!

“Akong sala, akong dakong sala”

Nakapangutana ang mga dagkong lider sa Kongreso kon ngano nga wala maapil ang mga senador ug ngano’ng ang ila lamang mga kauban ang gipasakaan og kaso kabahin sa kontrobersyal nga bicameral conference committee report nga maoy gihimong basehan sa 2025 national budget.  Dili pa man tingale kinahanglan ug labaw nga dili usab kini balido nga depensa sa hingtungdan.  Makapahinumdum na lang hinoon kini sa linya sa kanta ni Yoyoy Villame nga nagkanayon, “Kon ugaling duna kay tigmo (sala) nga lisod nga sabton (sagngon), Ikaw man ang nagtigmo (nakasala) imo sa’ng badbaron (atubangon).”  Muleeng!

Sayop nga sulbad?

Nangutana si Cebu City Councilor Jocelyn Pesquera ngano nga adunay na-issue nga resolution ang council secretariat bisan kon kini wala ma-aprobahi sa konseho.  Agi og tubag sa secretary sa Sanggunian Panglungsod, miingon siya nga ang nahasulat sa resolusyon mao mismo ang gipamulong sa Presiding Officer ug nga ang secretariat igo lamang nga matinud-anon nga mitala niini.  Maresolbar gilayon ang maong isyu pinaagi sa pagsusi og balik sa record sa maong sesyon.  Haum ni’ng kahimtanga ang panultihon nga, “Sa matag kumplikado nga suliran, adunay sulbad nga klaro, yano ug sayop.”  Atala lagee!

Ilisan ang ngalan

Gisalindot ni Agriculture Secretary Francisco Tiu-Laurel ang mga pagsaway sa mga kahugpongan sa mga mag-uuma kabahin sa hukom sa ahensya nga mo-angkat og 4,000 ka metriko tonelada nga sibuyas-bombay.  Nabatyagan nato nga matag adunay gihugon-hugon nga shortage sa usa ka agricultural commodity, pag-angkat sa laing nasud gilayon ang mahunahunaan nga solusyon sa DA.  Sugyot sa akong amigo, “Kon ingon na man lang diay niini kanunay, maayo pa’ng ilisan na lang ang ngalan sa Department of Agriculture ngadto sa Department of Importation.”  Pagkatoytoy!