Gideklarar sa gobiyerno ang Food Security Emergency niadtong Pebrero 3, 2025 tungod sa padayong nga pagsaka sa presyo sa bugas dinhi sa nasud. Basi sa Memorandum Circular Numero 3 nga gipagawas sa Departamento sa Agrikultura, ang deklarasyon magtugot sa National Food Authority sa pagbaligya sa ilang pundo nga bugas ngadto sa mga Lokal nga gobyerno, mga korporasyon nga gipanagiya ug gikontrolar sa gobyerno, mga Kadiwa sites ug ubang ahensiya sa gobyerno sa kantidad nga tag 33 pesos ang kilo.
Ning maong paagi matabangan ang mga konsumedor nga makapalit og baratong bugas ug ang mga mag-uuma mapalitan pod sa NFA sa ilang baligya nga humay.
Ang pagdeklar og Food Security Emergency dili makapabarayo sa presyo sa bugas hangtod sa hangtod kun ang coverage sa deklarasyon kutob lang sa pagpabarato sa bugas.
Kun dili bungkagon ang sindikato nga nagmaniubra sa presyo sa bugas, dili g’yud masulbad ang suliran sa pagsige og saka sa presyo sa bugas. Klaro kaayo nga giduwa-duwaan lang ta sa sindikato nga giabagan sa mga opisyal sa gobyerno.
Ang sindikato sa bugas nakahunat human napatuman ang Rice Tariffication Law nga maayo lang sa pangalan pero dako og kadaut nga nahatag ngadto sa mga hingaon og bugas.
Perpekto ang nahisgotang balaud sa pagwagtang sa kakompetensiya sa mga negosyante og bugas nga mao ang NFA. Kay wala na tugoti nga makabaligya ug makaangkat og bugas gawas sa nasud ang NFA, ang mga konsumedor nahikawan sa pagpalit ig tag P27 ug tag P32 nga kilo nga bugas. Kining maong presyo duol-duol na unta kini sa gisaad sa Presidente nga sa iyang administrasyon makapalit na ang mga tawo og tag P20 nga kilo sa bugas.
Ang kartel sa bugas miligon tungod sa Rice Tariffication Law.