Dugay ko na’ng gihisgutan dinhi ang way kahumanan nga mga proyekto sa Department of Public Works and Highways (DPWH) diha sa habagatang Sugbo. Ug ang makapasuko nga pagwaldas sa kwarta sa mga magbubuhis pinaagi sa pagguba sa maayo pa nga karsada aron sementohon pag-usab.
Gawas nga pag-usik ni sa buhis sa katawhan, nakamugna sab kini og grabing kahasol sa mga motorista tungod sa kalangan sa trabaho.
Ug salamat nga lakip si Gobernador Gwendolyn Garcia nakamatikod niining maong tinunto sa DPWH. Sayo ning semanaha, gipatawag sa gobernador alang sa us aka tigom didto sa Kapitolyo ang mga opisyal sa DPWH, labi pa sa second engineering district nga maoy dunay jurisdiction sa Segundo distrito sa lalawigan.
Atol sa tigom gilabhan sa gobernador ang district engineer tungod sa kalangan sa ilang proyekto ug sa kapakyas niini pag-coordinate sa lalawigan sa ilang mga proyekto didto sa habagatan. Matud sa gobernador nga ang wala pagpahibawo sa DPWH sa Kapitolyo sa ilang proyekto usa ka kalapasan sa ordinansa sa lalawigan nga nagmando sa tanang national government agencies nga mo-coordinate sa probinsiya sa dili pa mohimo sa ilang mga proyekto dinhi sa lalawigan. Tungod niini, gimando sa gobernador ang pagpasaka og kaso batok sa mga opisyal sa DPWH.
Labaw sa kapakyas sa DPWH pagpahibawo sa probinsiya sa Sugbo sa wala pa sugdi ang ilang proyekto, ang labing mahinungdanon mao nga mabadlong ang pag-usik sa kwarta sa katawhan pinaagi sa pag-ayo sa mga karsada nga dili pa angayang ayohon.
Gawas niini, angayan sab nga ipasabot sa mga opisyal sa DPWH ang hinungdan nganong gibiyaan niini ang proyekto nga taytayan diha sa lungsod sa Argao. Kun nakabantay mo dunay bag-ong gitukod nga taytayan lumbay sa karaang nga tulay dayon og sulod paingon sa Poblacion, Argao.
Dugay rang nahuman ang taytayan apan dili ni magamit sanglit gibiyaan sa kontraktor nga wala matrabaho ang “approaches” sa tulay. Sigun sa mga kasayuran nga akong nadunggan wala na kunoy pundo nga magamit aron paghuman sa proyekto.
Nganong naingon man niini? Anugon ug usik sa limitadong kwarta sa kagamhanan kun di mahuman ug magamit ang maong proyekto.