Gipanalipdan ni Solicitor General Menardo Guevarra atubangan sa Korte Suprema ang pagbalhin sa sobran’g pundo sa PhilHealth ngadto sa national treasury. Matud pa sa SolGen, mas maayo pa kini kay sa mangutang pa ang gobiyerno og pundo alang sa mga mahinungdanon’g programa sa panglawas ug ubang social projects. Kon pagpatuman sa mga programa sa panglawas ang katuyoan, dili gihapon makatarunganon ang pagbalhin sa pundo kay mismo ang PhilHealth, programa na man sa panglawas ang giatiman. Matud pa sa akong amigo, “Kong gusto gyud ang kongreso og dugang pundo, kunhoran unta nila o di ba kaha wagtangon na gyud ang kurapsyon.” Muleeng!
Ayuda, pundohan…Philhealth, laslasan
Gikondena sa mga medical professionals ang ilang giingon nga pag-sabotahe sa universal health care program (UHC) sa nasud human sa kapakyas sa gobyerno pagbalik sa gibalhin nga pundo sa PhilHealth ngadto sa nasudnong panudlanan. Inay panalipdan ang katungod sa katawhan kabahin sa ilang panglawas, ang gobyerno na man hinoon ang mismo mipatay sa UHC. Tulis sa atubang kining gibuhat sa mga kongresista. Komento pa sa kadaghanan, “Mas maayo pa ang ayuda sa mga ‘tambay kay gipundohan, ang PhilHealth hinoon nga katungod gayod sa katawhan, gilaslasan.” Fezteleern!
Buhi pero niwang
Mopagawas karong semanaha ang Department of Trade and Industry (DTI) og bag-ong suggested retail price (SRP) sa kapin 60 ka produkto sama sa sardinas, karneng de lata, evaporated milk, tinapay ug pan de sal. Wala pa gani mabuhat ang unang payroll nga nagpadayag na sa bag-ong naaprobahan nga diyotayng usbaw sa suholan, gipasakaan na usab dayon ang presyo sa palaliton. Dili gyud mahunong ang cycle sa kakabos sa nasud kon dili usab nato makorehian ang gintang tali sa suholan ug sa presyo sa palaliton. Matud pa sa akong silingan, “Sa kamahal sa presyo karon, mabuhi man tinuod ‘ta pero niwang.” Pagkatoytoy!
Dili sukod sa kinaadman
Nakaani’g mga pagsaway ang government-run university nga Pamantasan ng Cabuyao (PNC) sa Cabuyao, Laguna, tungod sa pagpatuman niini sa polisiya nga tanan nga motaak sa school campus kinahanglang nga mag-iningles sa ilang pagpamulong ug pagsulat, sa tuyo nga makahimo kini’g mga “globally competent” graduates. Morag dili lang mga etudyante, faculty ug ubang trabahante sa eskwelahan ang maapiki ni’ng maong polisiya kon dili lakip na usab mismo ang eskwelahan. Angayan unta hinumduman nga, “Ang English, usa lamang ka matang sa pinulongan ug dili sukod sa kalantip sa kinaadman.” Saoonz!
Nanimaho’ng Naric
Libkason ra unya sa Department of Agriculture ang gideklarar niini nga food security emergency sa bugas kon makita na sa ahensya nga nakab-ot na ang katuyoan niini. Giluwatan sa DA ang maong deklarasyon aron matubag ang giingon’g extra-ordinaryo nga pagsaka sa presyo sa bugas. Ingon na lang ba gyud ani ka inutil ang DA batok sa mga kartel nga kinahanglan pa man modeklarar og emerhensya aron makunhuran ang presyo sa bugas? Matud pa sa akong amigo, “Makalibog na, nanimaho pa gyu’ng NARIC ang maong emerhensya.” Madahaan!