Kining magkadako na ang atong edad murag dili na kaayo makadani nga anaa ka sa kadaghanan.
Ang kanhiay nga tinguha nga makigkita sa daghang mga higala, molaag bisan asa ang sa hinay hinay nahanaw na.
Hinuon basin sa akong personal nga panahom lang kini sanglit daghang mga tawo man nga susama nako og pangedaron ang mahiligon man gihapon ning maong buhat.
Kahilom. Kini ang gipangita ning maong galamhan. Kahilom dili lang sa palibot kondili sa kahiladman. Ang pag de center sa kaugalingon aron mamahimong motapot sa tinubdan sa kalinaw nga walay lain kondili ang Dios. Ang Dios nakigsulti dili diha sa kasaba kondili diha sa kahilom.
Adunay mga nindot nga linugdangan sa kahilom. Kini nanglangkob ning mosunod:
1. Diha sa kahilom makita nimo ang imong kaugalingon. Ang imong kaugalingon nga walay pagpaaron.
Ang kaugalingon nga puno sa kahugawan ug sa mga sala.
2. Diha sa kahilom makita nimo ang kamatuoran. Ang kamatuoran nga magdala kanimo og kaluwasan.
3. Diha sa kahilom imong makita ang imong kaugalingon diha sa luna sa tawhanong kalambigitan. Usahay diha sa atong tinguha nga mapalipay ang kadaghanan, mahanaw ang atong kaugalingon.
Diha sa pagpalayo gikan sa kadaghanan mas makita nimo kun sa unsang paagi kita mosulod ug mogawas gikan sa kalambigitan sa uban.
4. Ang pinakamahinungdanon diha sa kahilom atong masinati ang presensiya sa Dios diha sa paagi sa pagkamaampoon.
Tinuod gyud ang giingon nga bisan alone apan wala kini magpasabot nga kita lonely.