Hapit na mo tulo ka tuig ko nga nahimong sakop sa Cebu City Traffic Management Board ug ang ikasulti nako, lisud gyud kaayo masulbad ang grabeng traffic sa Metro Cebu.
Dili ra kay dinhi sa Cebu City ang dunay problema sa trapiko, kondili, apil na sa Mandaue, Lapu-Lapu, Consolacion, Liloan, Talisay, Minglanilla, Naga, San Fernando, ug Carcar.
Tan-aw nako, bisan kinsa pa ang mahimong mayor sa Cebu City, ug sa ubang mga dapit nga akong gihisgotan, dili sila makasulbad sa problema sa trapiko kon ang DPWH dili maghimo sa ilang katungdanan.
Unsa man ang akong gipasabot? Kinahanglan nga maghimo sila og laing dagkong mga karsada aron adto na moagi ang ubang sakyanan, apan hinay ang DPWH sa ilang paghimo og road widening.
Maayo man gani kay si kanhi Cebu Gov. Lito Osmeña naninguha nga mahimo ang Trans-Central Highway nga milagbas sa kabukiran sa Sugbo paingon sa Balamban nga kaagian sa uban nga moadto sa western ug northern towns.
Kon wa pa, anha magpunsisok ang mga sakyanan sa bugtong national highway paingon sa Bogo, ug ang national highway paingon sa southern municipalities.
Dako sab og natabang ang pagkamugna sa Cebu-Cordova Link Express-Way kay kadtong gikan sa Lapu-Lapu ug Cordova nga moanhi sa siyudad, dili na man moagi sa Mandaue ug namenosan ang trapiko didto.
Ang DPWH usa sa mga ahensiya sa kagamhanan nga gigahinan og dakong budget, apan makita nimo nga hinay kaayo sila sa pagpalapad sa atong mga karsada.
Hinuon, makasabot man ta nga ang problema sa road-right-of-way usahay maoy problema nga ilang giatubang, apan kon way motutok kanila nga mahuman ang mga proyekto, wa gyud sila’y mahimo.
Ikaduhang problema, wa gikontrolar sa kagamhanan ang pagdaghan sa mga sakyanan. Tiaw mo, kada tuig dunay madugang nga 80,000 ka bag-ong sakyanan dinhi sa Central Visayas, ug kadaghanan niini dia magdagan sa Cebu.
Daghan ang magyawyaw kay hilabihan kuno ka traffic nga usahay dili na moirog ang mga sakyanan sa karsada. Ang-ang, pwerteng daghana sa mga sakyanan nga magdungan pagpanggawas paingon sa trabaho, ilabi na sa sayong buntag, ug kadtong mamauli ini’g ka hapon.
Unya, traffic na kaayo, dugangan pa sa national government pinaagi sa Department of Transportation nga giibanan pa ang ubang karsada dinhi sa siyudad aron alang sa dugang pedestrian lane.
Kinsa gud tawo’y moagi diha kon init kaayo ang adlaw, ug kon mag-uwan. Sa laktud, “useless” na nga proyekto. Maayo tingali nga kon mag-uwan, palakwon nato diha sa pedestrian lane nga ilang gitukod ang manager sa Bus Rapid Transit project ug magkuyog sila ug ang secretary sa DOTR.