EDITORYAL - P200 usbaw sa suholan

Dunay giduso nga balaudnon sa Ubos Balay Balauranan nga nagtinguhang usbawan og P200 ang minimum wage sa tanang mga nagtrabaho sa pribadong sektor.

Nindot kaayo kini kay makatabang kini og gamay sa kakulang sa kita sa mga mamumuo sa pribadong sektor. Apan husto ba kini? Makiangayon ba sa tanan dili lang sa mga trabahador kondili apil sab sa mga negosyante?

Sa bag-ohay lang nga report gikan sa Philippine Statistics Authority, ang  inflation rate o pagsaka sa tanang presyo o sa makayang mapalit sa piso sa tuig 2024 niabot og 3.2%, nilapas kini og gamay sa  target range sa gobiyerno nga 2-4%. Ang hinungdan mao ang pagsaka sa housing, tubig, kuryente ug petrolyo.

Ang House Committee on Labor and Employment niadto lang Huwebes , Enero 30, miaprubar sa substitute bill nga naghiusa sa House Bills 514, 7568, 7871 ug 10139 — nga tanan nagduso og balaudnon nga pausbawan ang suholan sa tanang mga nagtrabaho sa pribadong sektor.

Kining gihiusang balaudnon giulohan og “An Act Providing for a P200 Daily Across-the-Board Increase in the Salary Rates of Employees and Workers in the Private Sector.”

Ang uban sa mga giduso nga usbaw nga suholan P150; dunay P100 ug ang pinakadako ang giduso nga usbaw sa Makabayan bloc nga P750 sa minimum wage aron dili maglisod ang mga Pilipinong pamilya.

Siguradong mokisi-kisi ang mga negosyante ani o kadtong kompanya kay dako-dako kini nga dugang gastos ug dako nga pahak sa ilang naandang ginansiya.

Kadtong adunay 100 ka mga empleyado, mapugos pagpuno og P20,000 kada adlaw sa kasamtangang gidawat nga sweldo sa ilang kawani, o P600,000 kada buwan.  Siguradong malipay ang mga nagtrabaho sa pribadong sektor bahin ani, apan ang pangutana kun makaayo ba kini sa mga negosyante nga maoy nagpasweldo kanila?

Unsa may epekto ani sa ekonomiya sa Pilipinas sa kinatibuk-an? Dili ba pud kaha mosaka og maayo tanang presyo sa mga palaliton ug serbisyo kay nidako ang capital o puhonan sa mga negosyante?

Dunay Regional Tripartite Wages and Productivity Board (RTWPB) nga gitahasang maoy mo-regulate sa mga suholan sa matag lokalidad, apan kaniadto pa ang mga mamumuo sa pribadong sektor wala gyuy salig sa maong ahensiya kay gihulagway nila kining adto pabor pirme sa mga negosyante.