Ipa-deputize gyud sa LTO

Ang mga driver dili gyud mahadlok madakpan sa mga traffic enforcer nga dili makaisyu kanila og Temporary Operators Permit (TOP) kay ang maong mga enforcers dili man deputized sa Land Transportation Office.

Magkatawa ra ang mga driver nga madakpan, labi na ang mga driver sa PUJ nga maoy sagad mga badlongon, kay dili man maimbargo ang ilang mga driver’s license.

Base gud sa Republic Act 4136, ang Land Transportation and Traffic Code, makuha lang ang drivers license kon isyuhan ang madakpang driver sa resibo nga gikan sa LTO, kana mao ang TOP.

Pananglit ang mga ordinaryong traffic enforcer nga dili deputized sa LTO, ang ilang gidala-dala, mga Traffic Citation Tickets ra nga wa magtugot kanila pagsakmit sa lisensya sa mga driver.

Tungod niini, mas maayo gyud nga ang mga traffic enforcers sa lainlaing siyudad ug lungsod, ipa-deputize sa LTO aron nga maisyuhan sila og TOP nga magamit nila pag-isyu kon makadakop sila’g driver nga nakalapas sa balaod sa tukmang pagmaneho og sakyanan.

Apan kadtong mga traffic enforcers nga gustong magpa-deputize sa LTO, kinahanglang mopasar sila sa examination aron pagsukod kon suhito ba sila sa mga lagda sa RA 4136.

Mas dagko og multa kon ang usa ka driver nga madakpan maisyuhan og TOP, kay sa mga madakpang driver nga isyuhan lang og Traffic Citation Ticket, mao nga maniguro sab gyud ang kadagkoan sa LTO.

Ang Cebu City Transportation Office (CCTO) mipadala na og mga sakop nga mi-undergo og examination sa LTO, apan gamay ra kaayo ang nakapasar kanila.

Ang mga traffic enforcer sa Mandaue nagplano sab nga magpa-deputize sila sa LTO, apan kinahanglan gihapon nga mopasar sila sa ihatag nga examination.

Ambot og tinuod ba nga modawat na ang LTO og mga traffic enforcer nga Job Order employees, kay ang akong nahibaw-an kaniadto, ang mga regular workers ra sa kagamhanan ang ilang dawaton nga mahimong deputized agent.

Kon ang mga traffic enforcers makaisyu na og TOP, dihang dapita mahadlok na ang mga drivers nga mohimo’g kalapasan sa traffic laws kay dagko man kaayo’g multa.

Dunay mga tagdumala og Local Government Units (LGU) nga dili ganahan nga ma-deputized sa LTO ang ilang enforcers, kay ang multa sa madakpang driver adto man sa national government.

Kon citation tickets ra gud ang iisyu sa madakpan nga driver, kataw-an ra sa mga driver ug dili ra nila tagdon ang ilang bayranan. Mao kana ang nahitabo karon.

Kon subayon nimo ang rekord sa Traffic Violations Bureau (TVB) daghang drivers nga nagtipun-og ang mga wa nila mabayri nga multahan.