EDITORYAL - Hunonga inyong pagpanghasi

Gitubag kagahapon ni Presidente Ferdinand Marcos Jr. kining bahin sa pipila ka semana nang tagawtaw sa China batok aning medium range Typhon Missile system sa Amerika nga gi-deploy diha sa Luzon.

Ang maong missile system nga matud pa interesado sab ang Philippine Army nga makapalit niini para sa depensa sa nasud, gidala dinhi sa miaging tuig alang sa Balikatan Exercises tali sa tropa sa Pilipinas ug sa US.

Ang pagdala niini dinhi, gitutokan gyud og maayo sa China. Tungod kay ang maong mga armas kayang maabot ang ilang nasud ilabi na ang tanang mga dagkong siyudad nga nag-atubang sa South China Sea.

Nagpasabot kini nga dako kining hulga kanila kun pananglitan magkagiyera diha sa Taiwan kun ilahang tinud-on ang tinguhang atakihon ang maong isla aron ibalik sa ilang sabakan.

Ang Pilipinas wala niini nga matang sa armas gawas lang sa Brahmos hypersonic missiles apan limitado ang kayang abuton niini ug gipalit lamang para sa depensa sa mga teritoryo  dili sama sa Typhon sa US nga pwedeng pang-opensa. 

Apan human ang Balikatan, wala gibalik sa US ang ilang Typhon missiles sa ilang nasud. Nagpabilin kini sa mga wala ibutyag nga lokasyon didto sa Luzon.  Nasayran nga ang Philippine Army nipadayag nga interesado kining makabaton sa maong missile system, hinuon wala pay dugang impormasyon may kalabotan niini.

Daghang nag-ingon nga gibuhat kini sa US aron gamiton pagdepensa sa nasud sa Taiwan kun sulongon kini sa China.

Ang nahimutangan sa maong missile systems sa Luzon kayang abuton ang Taiwan ug ang naglibot nga kadagatan niini, epektibo kining hulga sa bisan unsang pwersa sa China nga ipadala sa maong nasud.

Apan dili lang kana, makatabang sab kini unya sa Pilipinas batok sa China, kini ang rason nganong nikisi-kisi sila.

Si Marcos sa interbyu sa mga sakop sa media sa iyang pagbisita sa Sugbu kagahapon, nangutana nganong dako man kaayo og baba ang China batok ani? Nga mas daghan pa gani sila og missiles  itandi sa Pilipinas.

Usa ray mensahe ni Marcos ngadto sa China,  hunonga ang pagpanghasi sa mga Pilipino diha sa West Philippine Sea ayha niya papaulion ang Typhon balik didto sa US.