Paukyab nga pasalig
Ambot nagpahumot ba lang si House Speaker Martin Romualdez tungod sa nangalisbo nilang maniobra sa 2025 budget. Ambot nagpaukyab ba lang aron pagtabon sa ilang pagkakak sa impeachment ni Bise Presidente Sara Duterte. Ambot nitokar ba lang ang kahigwaos pagluwat og saad nga dili matuman.
Nipasalig si Romualdez og P200 nga uminto sa suholan sa mga trabahante sa tanang kompaniya sa tibuok nasud. Gihimo ang pasalig human siya nakigtagbo sa labor leaders niadtong Martes. Wala tang kahibawo dili ba molikoy ang iyang sulti human unya makigtagbo sa higanteng mga negosyante.
* * *
Pasayloa nga puno mi sa pagduda sa bag-ong saad ni Romualdez. Kay gisaaran sab niya ang mga mamumuo og P150 nga legislated wage increase sa niaging tuig. Pero natapos ang 2024 nga walay bisan usa ka dako nga uminto nga giaprobahan ang House.
Gidudahan nga ang P150 gihulbot ra gikan sa tumoy sa iyang buhok. Aron lang malabwan ang P100 nga uminto nga giaprobahan sa Senado sa Pebrero sa niaging tuig. Bisan sa daghan niyang pagarpar, wala matuki ang uminto sa suweldo sa komitiba ug wala makaabot sa plenaryo.
* * *
Maong gikabalak-an nga ang gisaad karon ni Romualdez nga mas dakong uminto dili sab mapatuman. Kay gawas nga manghulga na sab nga manira sa ilang mga kompaniya ang mga negosyante, nga maoy mas duol sa luwag sa Malakanyang, wala nay igong panahon ang Kongreso.
Tulo ka session days ang nahibilin (Lunes, Martes ug Miyerkules sa sunod semana) sa dili pang bakasyon para sa kampanya ug mobalik ang sesyon unya na liwas sa eleksiyon.
* * *
Pero makiangayon lang nga imbes gamiton sa pamolitika seryusuhon sa mga kongresista ug mga senador ang pagkurihir sa dakong inhustisya nga nahimo tungod sa pagtugyan sa ilang trabaho sa pagtakda sa suholan ngadto sa regional wage boards sa niaging 36 na ka tuig:
• Nabiyaan na og P144 ang P501 nga minimum nga inadlawng suholan sa Sugbo ug Central Visayas kon ikumparar sa P645 sa Metro Manila; samtang
• Mas dako pa gyod ang biya sa suholan sa ubang mga rehiyon labi na ang labing kabos nga Bangsamoro Autonomous Region sa Muslim Mindanao (BARMM) nga nabiyaan og P284 kada adlaw kay P361 ra.
* * *
- Latest
