Hasol gyud kong ang presidente mobisita sa usa ka dapit

Gipakyaw gyud ni Presidente Ferdinand Bong Bong Marcos Jr. ang tanang kalihokan nga iyang gitambongan kagahapong adlawa sa Sugbo. Tiaw mo kanang upat ka mga activities ang iyang giadtoan. Busa nagkapuliki usab ang mga sakop sa media kong asa man gyud dapita mo-cover kay hilabihan gyud ka higpit ang seguridad. Hinuon mao naman gyud kini ang protocol kay presidente man sa nasud ang ilang gibantayan.

Pero namatikdan sa pipilla ka mga sakop sa media nga medyo mihigpit karong higayona itandi sa mga pagbisita sa presidente sa nangaging panahon diin unreachable na kaayo si PBBM diin distansya ra gipahimutang ang mga reporters nga walay kahigayonan nga makapangutana kaniya sama sa social hall sa Kapitolyo nga na ra kinalikoran ang pwesto sa media samtang ang presidente toa sa atubangan. Labing seguro ang PSG o ang safety protocol team ang nagbuot sa set up. In fairness baya niining PBBM motagad ug motubag kini sa mga pangutana sa media sa nangaging panahon

Ambot kaha karon. Sa national media basin ok ra apan ang local media magtag-an tag-an pa kong naay kahigayonan nga makapangutana ug ang resulta nganga wala diay.

Mabantayan man sa mga sakop sa media nga kong adunay mga sensitibong mga isyu lihay kaayo ang presidente o ang mga tawo nga nagpalibot kaniya nga dili gyud pwede maduolan ug pangutan-on. Base sa kasinatian sa media ilabi na nako nga naniguwang na aning trabahoa gikan pa kang Erap, Gloria, Noynoy, Digong ug karon kang BBM sinukod ug scripted gyud ang pangutana, kanang i-filter daan sa mga tawo sa presidente ayha ka tugotan nga ipangutana.

Basin sa local media lang nga sa tan-aw nila taga probinsya ra maong ilang diktahan kon unsay ipangutana, nganong dili man pareho og treatment sa national media nga makapangutana man sila sa tanan nila gustong mga isyu. Nahisgotan lang nako kini kay makadismaya gyud. Pero wala man tay mahimo kay lagi naa man silay protocool. Samtang gihimug-atan gihapon sa pangulo ang kamahinungdanon sa papel sa mga lokal nga kagamhanan sa pagpatuman sa mga programa sa kagamhanan, ang gitawag nila nga priority projects lakip na ang plano nga pagtukod og container port, pagbutang og ika upat ka taytayan sa Mactan ug Cebu ug ang pagpahuman sa Cebu Bus Rapid Transit.

Nindot kaayo kon matinuod kini, apan wala man makakuha og detalye ang media kay lagi wala man magpainterview ang prsidente. Ang DOTR  secretary unta apan wala pud mi ka-interview kay gibabagan pud mi sa PSG hangtud sa parking area kay lagi dili pwede naa pa ang presidente sa venue. Wala gyud miy nadawdaw kagahapong adlawa. Karon nalang seguro ta mokuha og detalye aning programaha.