Bibliya

Niadtong bata pa ako, nahimo Nakong past time ang pagbasa og bibliya didto sa balay sa akong lolo ug lola. Kadtong akong Lolo Florentino ug kadtong akong Lola Delfina ila kong kuyogon sa bisan asang mga prayer meetings kaniadto.

Ug sa ilang Bible study nga sila rang duha, ako dukaon ug matulog. Pukawon ra ko nila kun tinghatag na sa snaks.

Apan ang maong sanglitanan nga gipakita sa akong mga apohan dako kaayo og kalambigitan sa akong kasamtangang kinabuhi karon.

Karong hamtong na ko, akong Nakita ang dakong bili sa Pulong sa Dios.

Ang Bibliya mao kadtong pulong sa Dios buhi ug makapadasig.

Ang iyang mensahe kun sabton lang gyud sa kinasingkasing gayud dako man og ikatampo sa atong adlaw adlaw nga pagkinabuhi.

Ang Pulong sa Dios giya sa matag adlaw nga panlimbasog batok sa mga gahom sa kangitngit. Apan nagkinahanglan kini og pagpangandam labina sa atong kasingkasing.

Nga sa ato pa:

1. Atong ablihan ang atong kasingkasing ug pasudlon ang mensahe.

2. Sa atong pag-abli niini aron makasulod ang mensahe kinahanglang malimpiyohan kini gikan sa bisan unsang mga mahugaw ug dili haom nga mga pagbati. Gitawag kini og emotional baggage ingon tang pulonga.

3. Human matipigan ug mapatuhop sa atong kasingkasing ang maong mensahe mahinungdanon usab kaayo nga makita kini sa buhat.

Kay ang Bibliya buhing pulong ug Pulong sa Dios angayan lamang nga kini makita mismo sa paagi nga atong gisaksihan ang atong pagtuo diha sa atong inadlaw nga pagkinabuhi.