Ibalik ang death penalty

Natugaw ang kamalinawon sa Purok Kamanggahan, Barangay Lutac, dakbayan sa Naga niadtong Lunes sa buntag dihang usa ka haligi sa pamilya ang miunay og patay sa iyang asawa ug duha ka mga anak nga nagpangidaron og onse ug dos anyos.

Ang suspetsado sa linoog nga krimin mao ang 33-anyos nga tindiro og butong nga si Carlo Camporedondo.  Pasado alas 10:30 niadtong Lunes sa buntag dihang gipanigbas ni Camporedondo ang iyang kapuyo nga si Junelyn Jimenez, 32, ug ang duha nila ka mga anak nga sila si John Carlo, 11, ug Lj, 2.

Way klarong rason nganong nahitabo ang makalilisang nga krimin gawas lang sa kasayuran nga ang suspetsado nagumon sa bisyo paggamit og illegal nga drugas. Matud sa mga silingan sa pamilyang Camporedondo, nakasinati na kaniadto og sakit sa utok ang suspetsado ug gani nalandig ni sa tambalanan tungod sa nervous breakdown.

Matud sa mga silingan nga magpunay og away ang managkapuyo tungod sa bisyo ug dugay ra unta nga   buot mobiya si Junelyn apan gibaharan ni sa suspetsado nga hutdon niya’g patay ang pamilya sa iyang kapuyo kun kini mobiya.

Sa kabalaka nga dunay dautang mahitabo sa iyang pamilya, labi pa sa iyang inahan, nag-antos si Junelyn uban sa kiliran sa adik niyang kapuyo hangtud nga nahitabo ang insidente niadtong Lunes.

Ambot gipakatulog ba sa ilang tanlag ang mga tawong responsabli pagpakatap sa illegal nga drugas nga dunay laing pamilya nga naguba tungod sa ilang kahakog sa kwarta. Dili ni unang higayon nga dunay ingon niini ka linoog nga krimin nga nahimo sa usa ka tawong naboang sa drugas. Ug sigurado ko nga dili sab ni maoy katapusan.

Pila pa ba ka inosenting kinabuhi ang makalas ug pila pa ka pamilya ug kaugmaon ang maguba tungod sa illegal nga drugas?

Panahon na tingali nga ibalik sa kagamhanan pagpatuman ang silot nga kamatayon alang sa tanang kaso nga maglambigit sa illegal nga drugas. Hinaot makaamgo na ang mga opisyal sa kagamhanan nga seryoso ang problema ug nagkinahanglan og mas isog nga solusyon.

Dili kinahanglang ipaagi sa extra-judicial sama sa nahitabo sa “war on drugs” ni kanhi Presidente Rodrigo Duterte.

Ang maayong buhaton ibalik ang death penalty sa mga makonbikto pagpamaligya og illegal nga drugas ug niadtong makahimo og linoog nga krimin tungod sa pagkagumon sa drugas.