Dili kasaligan sa maintenance

Migahin ang Department of Agriculture og P3 bilyones ka pesos alang sa pag-establisar og 99 ka cold storage facilities nga gituohan nga makapa-menos sa pagkadaut ug pagka-usik sa mga abot nga prutas, utanon ug uban pa’ng mga high-value crops. Sayod kita kon unsa kabulay-og ang gobyerno kon hisgutan ang pagmentinar sa mga nahimong inprastruktura busa dako ang purohan nga mangaguba lang kini.  Matud pa sa akong amigo, “Dili man gani maka-maintain sa kalimpyo sa mga pansayan (CR) sa ilang buhatan, labaw na’ng dili masaligan ang gobyerno pag-maintain sa mga dagkong inprastruktura.  Muleeng!

Mga buta ang nanakayan

Segun sa 2nd Congressional Commission on Education (Edcom 2) Year 2 Report, dul-an sa 25,000 ka mga eskwelahan ubos sa DepEd ang walay na-designate nga principal bisan sa polisiya nga nagmando nga adunay i-assign nga principal matag eskwelahan.  Dako kining kakulangon sa sistema ug pagdumala sa atong edukasyon.  Ni’ng kakulang sa hustong tigdumala sa mga tulonghaan, nakakomento ang akong amigo nga, “Mao diay’ng nangiwit ang atong mga tinun-an kay nahisama man ang mga tulonghaan sa sakayan nga pulos buta ang nanakayan unya nag-atubang pa gyud pag-bugsay busa wala gayod motulin.”  Fezteleern!

Dili sad imbitahon

Nahimangod si Mayor Michael Rama kay wala siya paapila sa preparasyon sa Sinulog karong tuiga, timaan nga wala’y respeto kaniya si Mayor Raymond Garcia ug ang mga nag-organisar sa Sinulog tungod sa kakulang nila sa “good manners and right conduct.”  Mora’g nanimaho’ng politika ang hinungdan sa wala pagpaapil ni Mike Rama.  Kining pagpadayag ni Mayor Rama sa iyang kahimangod makapahinumdum sa bata nga nasuko kay wala imbitaha sa iyang amigo sa kumbira human sa lubong sa iyang namatay nga apohan busa mibahad kini sa pag-ingon nga, “Sige lang mo. Inig kamatay sad sa akong Lolo, dili sad ta mo imbitahon.”  Madahaan!

Kinahanglan’g pamatud-an

Naglaraw ang Department of Agriculture nga mo-imponer kini og Maximum Suggested Retail Price (MSRP) sa karne’ng baboy tungod sa nabatyagan nga tuman’g pagsaka sa presyo niini sa kamerkadohan sa Metro Manila, sama sa gibuhat sa DA nga pagkontrolar sa presyo sa imported nga bugas.  Bisan tuod og ikahinangop sa katawhan kining plano sa DA, apan dili masaligan ang pagpatuman niini.  Sama sa presyo sa bugas nga misaka man hinoon pag-ayo, gituohan nga supakon gihapon ang MSRP sa mga negosyante.  Mao kana’y giingon sa pagya nga “Matud ni Lola, ayaw’g too basta sulti lang busa kinahanglan pamatud-an.”  Maylain pa!

Politika ang hinungdan

Napasar na sa Kongreso ang House Bill 11287, ang balaodnon nga nagtumong sa paglugway sa termino sa mga barangay ug Sangguniang Kabataan ngadto sa 6 ka tuig, gikan sa naandan nga 3 ka tuig.  Ubos sa maong balaodnon, ang sunod nga eleksyon, pagahimoon karon pa’ng Mayo 2029.  Daghan ang nagtoo nga pamolitika ra gihapon ang tuyo ni’ng maong balaodnon.  Komento pa sa akong abogado’ng amigo, “Kay politika man ang hinungdan, dako ang posibilidad nga amendahon ra usab ang maong balaod sa umaabot tungod gihapon sa politikanhong katuyoan.”  Pagkatoytoy!