Grabeha uy, sagunson ang pagkasakmit sa hilabihan kadaghang shabu sulod lang sa pipila ka adlaw nga milabay.
Una, 25 ka kilos nga shabu nasakmit diha sa pantalan sa Cebu City ug nadakpan ang inahan ug ang iyang anak nga taga Ermita.
Dayon, didto sa Agusan sa northern Mindanao, laing 16 ka kilong shabu nasakmit sab sa kapolisan ug mga sakop sa PDEA kay nakadawat sila’g inpormasyon gikan sa ilang mga tigpaniid.
Unya, didto sa Catbalogan, Samar kaniadtong Martes, nakasakmit na usab ang mga polis og tulo ka kilong shabu atol sa checkpoint operations sa Maharlika Highway.
Mao na nga dili nato mabasol nga dunay ubang tawo nga miingon nga human nga wa na sa katungdanan si Presidente Duterte, misiaw na pagbalik ang mga badlongon.
Nakasabot ko nga ang mga tawo mora’g gimingaw sa pamaagi sa kapolisan atol sa termino ni Duterte nga tipion gyud kadtong mga nalambigit sa pagpayuhot sa gidiling drugas.
Kini maoy rason nga si Duterte ug ang iyang mga hinanib, ilabi na ni kanhi PNP Chief ug karon Senador Ronald “Bato” Dela Rosa nag-atubang og imbestigasyon sa International Criminal Court.
Kon ako’y pangayoan og tambag kon unsay buhaton, ingnon nako si Presidente Bongbong nga kinahanglang tinud-on na gyud kining mga tigpayuhot og drugas, ug mandoan ang kapolisan nga hugtan ang kampanya sa mga tulisan ug ubang kriminal.
Pananglit ako pa’y presidente sa nasud, kuhaon nako si kanhi Senador Panfilo Lacson, nga nahimo sab kaniadto nga PNP Chief, aron tugyanan sa paglusad og hugtanay’ng kampanya batok sa drugas.
Nindot kaayo ang kampanya ni Lacson kaniadto dihang siya maoy nangulo sa Presidential Anti-Organized Crime Task Force (PAOCTF) kay mora’g nagkurog ang mga nalambigit sa ilegal nga kalihokan.
* * *
Atol sa press conference ni dismissed Cebu City Mayor Michael Rama kaniadtong Martes, gimandoan niya ang iyang mga abogado nga andamon ang mga dukomento aron pasakaan nila’g disbarment case si Cebu City Mayor Raymond Alvin Garcia.
Gipangutana si Rama sa media kon unsay basehanan niya nga gusto man niyang matangtangan og lisensiya pagka abogado si Garcia, ug iyang gipasabot nga tungod kini kay miasumier siya sa pagka mayor bisan og dili kompleto ang dukomento.
Aw tun-an pa hinuon kini sa mga abogado ni Rama, kon unsa gyuy ilang mga argumento nga masuporta sa pagpasaka og disbarment case, kay ignorance of law man kuno.
Pero si Mayor Garcia igo ra miingon nga wa siya mabalaka tungod kay ang iyang pag-asumier pagka mayor, tungod kini sa kamandoan sa DILG, ug ang nagpa-take oath gani niya mao man ang director sa DILG.
Nindot hinuon ni kay aron nga mahusay gyud kay ang argumento ni Rama mao man nga wa gyud ma-serve kaniya ang dismissal order sa Ombudsman tungod sa kasong nepotism.