EDITORYAL - Dangan nga ilegal nga drugas

Makasubo ang nahitabo sa duha ka mga bata ug ilang inahan nga gipanglunggoan sa ilang mga liog sa ilaha mismong padre de pamilya diha sa Dakbayan sa Naga niadtong adlaw nga Lunes sayo sa buntag.

Ang gitumbok nga hinungdan mao ang pagkagumon niini sa ilegal nga drugas ug sugal nga scatter mao nga mura na siya og nalimot sa kaugalingon ug nabuhat ang maong linoog nga krimen ngadto sa iyang pamilya. Kaniadto pa dangan na gyud kining ilegal nga drugas.               

Sa mga nibasol niining tanan ngadto sa kasamtangang gobiyerno, dako kining sayop. Kay hagbay ra kining problemaha ug dili kay karon lang nahitabo dinhi sa Pilipinas.

Bisan gani ang Amerika nga dunay labing sopistikado ug modernong teknolohiya pag-monitor ug pagsikop sa mga nalambigit niini wala makapakgang sa problema bisan diha sa mismo nilang tugkaran.

Dili man ta makaingon nga walay gibuhat ang kapolisan ug ang mga law enforcement agencies kay makita man nga daghan sila og mga nadakpan, gani kinilo na gani karon ang ilang makuha pirme sa mga operasyon.

Napulo ka tuig na ang nakalabay gramo-gramo ra o “bulto” ray makuha sa mga operasyon mga otoridad. Kadtong makuhaan og bulto  tawgon na dayon og “druglord” o bigtime drug pusher.

Apan wala gyud kanilay nakuhaan og tagsa ka kilong shabu, bisan kadtong mga notado na nga napatay sa kapolisan sa naghinapos nga bahin sa administrasyong Aquino ug sa paglingkod sunod nga administrasyon.

Gilusad ang kontrobersiyal nga dugoong  war on drugs ni kanhi presidente Rodrigo Duterte atol sa iyang termino diin nauso ang “tokhang” aron pa-surenderon ang mga nalambigit sa ilegal nga drugas aron sila magbag-o.

Apan kadungan sab niini ang pagkapatay sa gibanabanang 6,000 (base sa gitug-an sa PNP) nga drug personalities kay nisukol kanila. Kadaghanan mga drug users ug street level pushers.

Sa talaan sa mga human rights advocates sobra 30,000 napatay atol sa war on drugs ug daghan kanila ang matud pa inosente, mga biktima sila sa extra-judicial killings.

Malampuson ba kadtong war on drugs? Makahibulong nganong kinilo na man hinuon ang mga shabu nga masakmit sa mga otoridad? 

Kun subayon ang mga panghitabo, nagsugod kining kinilo nga ilegal nga drugas sa dihang nidagsa ang mga Chinese dinhi.