Dear Atty. Divine,
Maayong Adlaw. Nag email ko nimu Atty. mahitungod sa yuta nga igbalaligya unya nagkinahanglan ko'g legal advice. Ang yuta kay naka pangalan sa patay na nga ginikanan unya adunay 10 ka mga anak nga sumusunod. Dayon ang walo ka anak nga sumusunond gusto nilang ibaligya ang ilang bahin, pero ang duha ka manghod dili gustong mobaligya sa ilang share. Unsay angayan buhaton arun mahalin ug mabayran ang walo ka heirs. Palihog tambagi ko Atty. aron makab-ot naku ang kahusayan niini. Daghang salamat.
Inday
* * *
Dear Inday,
Aron mamahimong makabaligya sa ilang share ang ubang mga heirs, mas maayo nga ilang ipa-subdivide ang property. Ilang ipa-survey ang tibuok luna ug human niini, ilang ipabu-ak aron ma identify ang share sa matag usa kanila. Human niini, mo-execute sila og Extrajudicial Partition nga pirmahan sa tanang mga heirs ug ipa-notarized. Apan kun aduna nay buyer ang ubang heirs, mamahimong ilakip na sa ilang Extrajudicial Partition ang pagbaligya sa ilang share aron mausa ang pag-process sa pag-transfer niini. Kinahanglan nga ilang bayran ang Estate Tax ngadto sa BIR aron hingpit nang mabalhin sa ilang tagsa-tagsa ka pangan ang ilang share sa maong luna. Thank you and God bless.
Atty. Divine
* * *
Alang sa inyong pangutana, palihug lang sa pag-email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.