Gipareha sa manok pag-ihaw ang iyang pamilya

Human sa nahitabong krimen sa Baranggay Maribago sa dakbayan sa Lapu-Lapu niadtong miaging semana diin gipamusil sa usa ka adik ang mga tawo nga iyang natagboan kay naalaan nga mga demonyo nga misangpot sa kamatayon sa tulo sa mga tawo, mitugbang usab ang nahitabo sa Baranggay Lutac sa dakbayan sa Naga.

Niadtong niaging adlaw nahitabo ang makapanglimbawot sa balhibo nga gilambigitan sa magpamilya. Giihaw sa 33-anyos nga lalaki ang iyang kapuyo ug ang duha ka mga anak niini nga nag edad og onse ug dos anyos sulod mismo sa ilang payag.

Naa pay momho sa kan-on ang bata nga nagpaila lang nga kamulo kining gakaon dihang giapil kini sa paggulgol ang liog sa iyang amahan.

Mora’g nag-ihaw og manok kining tawhanan nga gigulgol g’yud ang liog panit nalang ang naghawid. Gamit niya mao ang sundang nga maoy gigamit nila sa pagpamaligya og buko o butong nga hilabihan ka hapit sa usa ka tigbas lang buak gyud ang butong.

Nganong nahimo man kini sa usa ka amahan ngadto sa iyang pamilya ang linoog nga pamaagi sa pagpapahulay sa iyang mga mahal sa kinabuhi? Sayon ra kaayo ang tubag.

Ug kini mao ang pagkagumon niini sa bisyo, ang illegal drugs ug ang illegal gambling. Ang mga yawan-on nga buhat nga gipagrabe pa ngadto sa pagpatay.

Kining si Carlo Camporedondo namaligya kini og buko o butong sa dakbayan sa Sugbo. Sa sinugdanan buotan ra apan nagkadugay nausab ang iyang kinaiya ilabi na dihang nakatultol kini sa langub sa drugas nga ilang hingosanan.

Ang kanhi mapinanggaon nga padre de pamilya nahimo namang demonyo.

Kaniadto ang pares niini nga si Lenlen didto ra unta sa ilang payag sa Lutag, Naga magpuyo kauban ang tulo ka mga anak.

Apan dihang nabuang na ang bana sa bisyo iya na kining giubanan sa ilang panginabuhi. Magsige sila og away kay dili man mopatuo badlongon sa babaye si Carlo.

Tungod sa ka ungo sa bisyo aning tawhana, mananghid pa siya sa kapuyo nga mosuyop sa kadyot maong mag-away na usab sila.

Maghilak ang ang adlaw kon dili mag-away kining manag live-in partner nga nasaksihan sa mga tawo diha sa ilang gipuy-an sa JM Basa Street sa Barangay Pasil.

Sa wala pa mahitabo ang krimen, naglalis na usab kining duha kay nasuko ang lalaki nga wala gihawanan sa babaye ang ilang kariton nga kargahanan og mga buko. Ug didto mihukom ang lalaki nga mamauli sila sa ilang barangay sa Naga ug gidala niini ang iyang sundang.

Mao na diay kadto ang iyang plano nga ihawon ang iyang kapuyo ug mga anak. Maayo nalang kay naluwas ang usa niya ka anak kay nag- eskwela kay kong wala pa lampormas ggyud silang tanan.

Ingon niini nalang gyud kaisog ang drugas karon nga dili naman makaila og tawo bisan kadtong sakop sa pamilya pamatyon naman? Nagpakita lang kini kon unsa ka grabe ang problema sa illegal drugs karon.

Niining bag-o lang adunay tunga sa sakong drugas worth P170 million nga nasakmit sa pantalan sa dakbayan sa Sugbo. Kong nakalusot kadto daghan pa nga Carlo Camporedondo ang maglatagaw sa kalibotan.