Garcia makadisgrasiya

Aniay pipila ka bug-at rason nganong nawad-an na'g amor ang nagpakabanang katilingban ni Commission on Election (Comelec) chairman George Garcia?

Sa Kongreso naimbistigahan ang inpormasiyong nahipos ni Rep. Rodante Marcoleta, diin ang nahisgotang Comelec opisyal midawat og bribe money gikan sa South Korean pol tech firm, Miru Systems aron kini maoy padag-on sa bidding. Gikuwestiyon ni Marcoleta ang natimahoang offshore account ni Garcia sa Cayman Island, diin nadepositohan-nasudlag P1B alang sa P17.9B Comelec awarding contract ngadto sa Miru Systems nga maoy mosuplay og vote counting machines para sa 2025 midterm election.

Hetsas sa mga nahuptang lehitimong ebidensiya si Marcoleta, kinsa human hadlokang ikiha ni Garcia, misamot hinuog kaisog ug kalig-on nga maoy nakapabahag sa ikog ni Garcia, kinsa medisider nga moatras na lang ug mopukos sa iyang trabahoonon alang sa 2025 midterm election.

Si Garcia usa sa tulo ka Pilipinong gi-appoint isip mga opisyal sa Comelec ni kanhi Presidente Rodrigo Roa Duterte. Si Garcia ug Aimee Neri – mga commissioner samtang si Saidamen Pangarungan ang chairman, ubos sa dinaliang paagi sa pagpili, diin wala na mag-agi sa naandang proseso sa Commission on Apointment. Pagdaog ni BBM pagka-presidente sa 2022, daghang nagtuo nga i-reappoint ni PBBM ang naasoy'ng tulo, pero nabawo sila. Kay si Garcia ray gi-reappoint. Ug gihimo pang Comelec chairman.

Misamot kamaot si Garcia dihang mipadalag Temporary Restraining Order ang Korte Suprema aron ipahunong ang nasugdan nang pag-imprinta sa 2025 midterm-election ballots kay adunay lima ka kandidatong wala mahiapil ang pangalan human gi-disqualify sa Comelec. Kini walay labot sa usa ka Nene Bacale, mikandidato pagka-Kongresista batok kang House Speakder Martin Romualdez sa Tacloban City, kinsa mireklamo nganong wala maapil iyang ngalan sa pag-imprinta nga naaprobahan man sa Comelec ang iyang COC?

Namahayag si Garcia. Dili kuno registered voter si Nene sa naasoy'ng distritong daganan, maong gi-disqualify. Kini kaha tinuod hinungdan? O, tungod kay nahigtan na sab siya sa giilang hari sa korapsiyon sa Pilipinas karon? Hinungdan, halos tanang botante nakuyawan. Kay basin mga kandidatong maoy lehitimong modaog sa 2025 election mapilde, ug ang mga nangiwit sa kasaligang pre-election surveys, mao hinuoy modaog?

Busa, daghang kritiko mikomentariyo sa ilang nakitang imahe sa Comelec chairman: “Garcia? Makadisgrasiya!